SI FRANCIS Gabriel Escandor ang mialsa sa Ateneo de Davao University (Addu) Blue Knights aron ilangkat sa three time defending champion ug kusog kalaban Assumption College of Davao (ACD) Warriors, 75-73, ang titulo sa National Basketball Training Center Davao High School basketball niadtong Dominggo sa hapon, Pebrero 19, didto sa Goldstar Gym sa Bo. Obrero, Davao City.

Mihimo si Escandor og lima sa unom ka tres puntos aron mohuman og 17 puntos.

Mitabang sab kaniya sila teammates Axel Doromal ug Marion Angeles sa pagpasa sa bola aron makalabay alang sa tim.

Si Doromal ang giilang most outstanding player of the year nga miiskor og 24 puntos gawas sa 17 puntos ni Escandor ug 16 puntos ni Marion Angeles aron makuha ang titulo.

Samtang, misalig ang ACD sa serbisyo nila BJ Sumugat ug Cris Marvin Vistal kinsa nakalansang og 22 ug 17 puntos sa maong han-ay.

“I listened to coach Miggy (Miguel Solitaria) to take the open shots,” pahayag ni Escandor, hinungdan nga maayo ang iyang performance atol sa pakighinabi kaniya human sa duwa.

Ang mikumpleto sa pagtabang sa pagdaug sa Addu mao sila Joshua Barrientos, Isaac Selgas, Joachim Weill, Joshua Go, Jan Rubiato, Matthew Martinez, Dom Cane, James Bacalso, Jethro Taculin ug Kenneth Batilo.