DEAR Noy Tikyo,
Ulitawo ko, dunay uyab apan tua sa layo nagtrabaho. Nagkasabot na ming magminyo two years from now.
Ako diay si Walter, 28-anyos.
Ang akong problema di bahin niya, kon di bahin sa babaye nga nalambigit sa akong kinabuhi nga wa damha.
Higala ko siya sa dugay nang panahon. Kanhi schoolmate ko siya sa college. Naminyo siya apan buwag na sa bana. Duna siyay usa ka anak.
Wala koy pagbati niya apan duna nay nahitabo na namo makausa ka higayon.
Ingon niini ang nahitabo, nag-birthday ang iyang anak. Ug tungod kay best of friends mi, usa ko sa giimbitahan niyang bisita.
Ang ako lang nahinumdoman nga alegro kaayo ang okasyon nga human sa kaon, gisugdan gilayon ang panag-inom og ilimnong makahubog.
Apan sa wa ko damha, nahigmata ko nga tua na sa sulod sa kuwarto sa babaye nga pulos na way sapot sa lawas. Dunay nahitabo namo. Grabe diay nakong huboga niadtong gabhiona.
Karon milikay nako niya. Apan padayon siyang mag-text ug manawag nako sa selpon.
Nakonsensiya ko sa ang akong girlfriend. Buotan ug reponsable siya busa lisud nga luiban.
Ang problema kay kon unsaon ko paglikay ning akong amiga nga hangtud karon padayon nga nagtental kanako.
Niadtong Dominggo, giingnan ko sa akong landlady nga dunay nangitang babaye sa boarding house nga akong gipuy-an ug nagtuo ko nga siya kadto.
Unsaon ko na man ni, Noy, makalikay pa kaha ko niya?
Waler
***
Walter,
Mao nay giingon nga "if there's a will, there's a way." Bisan unsaon pa niya og gukod nimo, kon ikaw di gyud gusto niya, mahimo kaayo nimo siyang likayan.
Bug-osa ang imong hukom ug ayaw padala niining iyang pagka-agresibo nimo. Di na angay nga subli pang dunay mahitabo tali kaninyo.
Okay ra unta to kon dalaga siya, kay ulitawo man ka. Apan sa iyang status karon, di mahimo nga magkakamo. Lisud kon imong paundayonan ang tinguha niya kay duna man siyay kabilinggan sa kinabuhi. Bisan og buwag sila sa iyang bana, pabilin silang gibugkos sa talikala sa kaminyuon.
Aron nga di ka masundan niya, mas maayo og mag-ilis ka og simpack sa imong selpon aron nga di na siya makakontak nimo bisan kanus-a.
Ug ikaduha, balhin nianang boarding house nga imong gipuy-an aron nga di na siya makatultol nimo ug di ka na mahasol pa og maayo.
Mao ni ang angay nimong buhaton kon gusto ka gyud nga molikay niya.
Noy Tikyo