ANG bag-ong gipahimutang nga hepe sa Davao City Transport and Traffic Management Office (CTTMO) nga si retired Superintendent Deonesio Abude misaad nga mopatuman og disiplina aron nga mahapsay ang dagan sa trapiko sa dakbayan.

Gipasalig ni Abude nga pitulon niya di lang mga traffic enforcers, kon di lakip na sab ang mga drayber, pasahero, manindahay, ug uban pa nga mga mogamit sa kadalanan.

Niadtong Enero, gisugdan na ang pagpanakop sa mga pedestrian nga pataka lang og tabok sa kadalanan sa dakbayan.

Gani ubay-ubay na ang nangadakpan ug gipa-seminar isip silot sa ilang pagsupak sa gipatuman nga Anti-Jaywalking Ordinance sa dakbayan.

Apan taliwa niini, duna pay mga balaod-trapiko sa dakbayan nga gi-tolerar lang ug wa hingpit gipatuman sa CTTMO. Sama pananglit kining pagbiyahe sa mga traysikad ug mga habal-habal sa mga highway.

Tinuod panginabuhi na kini sa pipila sa atong mga kaigsuonan, apan angay sab nga lantawon ang ilang kaluwasan, lakip na ang mga pasahero.

Usa kini sa mga hagit karon sa bag-ong hepe sa CTTMO nga si Abude.

Kay gawas nga peligro, nakahatag sab kini og kaguot sa dagan sa trapiko sa pipila ka kadalanan ning dakbayan.