LIMA ang gibalitang namatay sa engkuwentro tali sa Armed Forces of the Philippines (AFP) ug New People's Army (NPA) sa Lamanan, Calinan District ning dakbayan.

Plano unta namo nga moadto sa Barangay Lacson ug Lamanan niadtong niaging semana aron lantawon ang usa ka luna nga posibleng butangan og tomato greenhouse apan wa kini madayon tungod sa gibalita nga sinukliay og mga bala didtong dapita.

Resulta na kini sa pag-atras sa Communist Party of the Philippines (CPP)-NPA sa ilang ceasefire kay wa daw tumana sa administrasyon ni Presidente Rodrigo Duterte ang gisaad niini nga pagawason ang 400 ka mga political detainees.

Pagkahuman niini, gihunong usab ni PRody ang ceasefire sa AFP ug nagmando og all-out war batok sa rebeldeng grupo nga gibansagan gilayon sa iyang mga military advisers nga terorista.

Sa hunahuna pa sa presidente, puslan man nga dili makahulat ang CPP-NPA nga masulbad niini ang legal nga babag sa pagpaguwa sa mga political detainees, giyera na ta!

Gawas dinhi sa Davao, anaa na say mga gibalitang engkuwentro sa Compostela Valley Province ug sa uban pang probinsya sa nasud.

Nangandam na sab ang AFP sa dinugay nga bahug-bahog sama sa nangaging panahon samtang andam na sab ang mga kadre sa NPA sa ilang kontroladong erya sa pagsulod sa tropa sa militar.

Mao kini ang gipakigbisugan sa NPA sulod sa sobra 40 ka tuig mao nga way rason nga di sila makahulat og usa pa ka dekada kung madiskarel pag-usab ang hinabing pangkalinaw ubos sa administrasyon ni Duterte.

Tanang peace advocates nasayangan sa oportunidad nga makab-ot ang kalinaw ilabi na nga usa sa prayoridad sa pangulo mao ang kalinaw.

Siya pa gani ang nanguna'g deklara og unilateral ceasefire aron magsugod ang nauknol nga hinabing pangkalinaw.

Sa pagkatinuod, mao kini ang usa sa mga hinungdan nganong daghan ang nisuporta kaniya sa niaging piniliay ilabi na kadtong gikapoy na sa giyera nga daw way kapadulngan ug nagdala'g hilabihang kalisud sa katawhan.

Para kanako, kon di pa madayon ang peace talks karon nga si Duterte pa ang anaa sa gahum, dugay na pod nga panahon ang latason aron makaabot sa susamang ang-ang sa panaghinabi.

Tiaw mong tulo na ka hugna ang panagsabot sa duruha ka peace panels; ang duhang hugna didto sa Oslo, Norway samtang ang ika-tulo didto sa Italy.

Malipayon na unta ang pamilya sa mga sakop sa NPA ug AFP kay dili na sila magpinatyanay, hinunua makabalik sila sa ilang pinuy-anan nga malinawon ug layo sa kasamok.

Atrasado na usab ang dagan sa ekonomiya sa lugar nga anaay kasamok ilabi na dinhi sa Mindanao.

Gisayangan ang mga negusyante kay maapektohan ang ilang pangita nga ila na untang ipundar sa mga lugar nga anaa ang kasamok.

Kinsa pa kahang negusyante nga mobubo og puhunan kung nagpungasi ang mga bala?

Busa nanawagan ang daghang grupo, apil na ang kasimbahanan nga ibalik na ang hinabing pangkalinaw.

Di pa lang dugay, nakighinabi ang mga progresibong sakop sa gabinete sa presidente aron ipadangat kaniya ang hangyo sa daghang grupo nga ipadayon ang peace talks. Malaumon kita nga mobalik na sila'g istorya kay mao kini ang saad sa pangulo ug motabang kita nga madayon kini, mga silingan!