ANG dakong binuang mao ang nahitabo ni Joseph Blackburne nga gidakop sa mga pulis sa England kay nagpadala og chess moves sa mail. Abi nila espiya siya sa France nga nagpadala og coded secrets.

Ang lain sad nga binuang mao ang pagdakop og pagpriso kang Pal Benko og unom ka mga buwan sa Hungarian jail kay ni-defect siya sa America. Pagrekisa nila naa sad siya’y mail nga puno og chess moves nga abi nila codes sab ug espiya siya.

Dakpon diay kon moduwa og chess sa park? Mao ni ang nahitabo sa pito ka chess players sa Imwood Hill, New York. Dili diay puede kuno moduwa didto kung wala’y uban og bata. Pero ang pagdakop nila mura og mga kriminal kay fully armed ang mga pulis ug nagsul-ob og bullet proof vests. Ingon ang media nahadlok kuno ang pulis basig labayan og “poison pawns”

Adtong 1973 sa Cleveland, gidakop ang tournament organizer sa usa ka chess tournament kay illegal gambling kuno kay naa’y cash prizes. Mao sad ni ang nahitabo sa Los Angeles sa tulo ka players sa park kay naa’y $1.50 sa lamesa

Ang sikat nga si Bobby Fischer gidakop pud kay ang description sa kawatan sa usa ka banko pareha niya og nawong ug napriso siya og duha ka mga adlaw. Napriso usab si Bobby sa Japan kay iyang passport gi-cancel na sa Amerika. Niduwa man gud siya sa Yugoslavia kontra ni Boris Spassky nga gibawal sa Amerika.

Si Louis Taylor niadto og library ug nibasa og chess book. Iyang giladlad ang iyang chess set sa lamesa ug gibadlong sa librarian. Apan nisupak siya. Nitawag ang librarian og mga pulis ug giposasan siya for trespassing.

Naa’y chessplayer sa San Antonio nga nasuko sa tournament director kay pirme siya gikontra og lig-on nga player kay kuno gituyo. Iyang gigise ang tanan nga pairing sheets. Gitawag ang pulis ug gidakop siya.

Adtong July 2006, duha ka chess players gipangdakop sa Trinidad kay gitago ang cocaine sa chessboard. 7 kgs ang gibug-aton ug ni balor og $3million.

Ang world champion nga si Garry Kasparov gidakop ug napriso og lima ka mga adlaw kay niapil og rally kontra sa Russia. Ilado si Garry nga supak sa Russian president nga si Vladimir Putin.

Niadtong 2008, naa’y chess player nga gidakop sa Boston nga nag-charge og $63 sa mga bata nga iya kuno tudloan og chess. Pero ilad diay.

Gipusil ni William Russ ang iyang adopted daughter kay nibalibad niya nga magpakasal. Niambak siya sa sapa para maghikog pero wala siya mamatay. Gidakop siya ug napriso pero namatay kay nawad-an na siya paglaom nga mabuhi.

Adtong US Civil War, si Armand Blackmar gidakop ug gipriso sa mga Union soldiers kay ni publish ug Confederate music.

(boypestano@gmail.com)