GIPAKITA ni Jon-Jon Adlawan kon nganong siya ang No.1 rider sa Sugbo pinaagi sa paglangkat og duha ka mga titulo sa 5th Mayor Butch Sepulveda Motocross Cup- 2015 MS Motosuit Motocross Series ning bag-uhay lang sa Barangay Lugo, Borbon, Cebu.
Si Adlawan, kinsa sakop sa Man and Machine Racing, nipakita og maayong abilidad sa iyang paghari sa expert ug pro open categories sa lumba nga giorganisar ni MS Motosuit big boss Lou Ornopia.
Gipanglupig ni Adlawan sila si Dondon Yusona ug Venil Abellar sa duha ka mga kategoriya.
Nakakuha sab og atensyon ang beteranong si Pepo Rubi ug ang sumosulbong nga si BJ Pepito human nila gipatigbabawan ang ilang tagsatagsa ka mga kategoriya.
Mikampiyon si Rubi sa veterans class samtang nidaog si Pepito sa mini 85cc.
Ang mga nagsunod kang Rubi mao sila si Jayson Bayawa ug Roscel Gungob samtang ang nagsunod kang Pepito mao sila si Ren Hisoler ug Agsoy Judilito.
Nakabawi si Gungob human niya napatigbabawan ang executive A diin iyang nabuntog sila si James Duroy ug Jun Enriquez.
Si Enriquez nibawi sab sa exectuive B ug iyang nadaog kining maong kategoriya. Nagsunod kang Enriquez mao sila si Jonathan Cuyos ug Nelson Sicao.
Ang niangkon sa executive C mao si Don Dejaresco, kinsa gisundan nila ni Edsel Corbeso ug Jaymay Bueno.
Ang ubang mga ningdaog mao sila si Jessie Pineda sa intermediate category, Wensor Famorca sa freestyle, Gualiza sa beginners open production, Michael Tuvilla sa mini 65, Ren Hisoler sa local enduro, Jogie Basco sa novice open production, JP Cuesta sa open enduro, Donkey Sanchez sa underbone, RK Cuesta sa ladies, ug Joji Basco sa peweee 50cc.