MILAMPOS ang Cleveland Cavaliers sa ilang misyon nga limitahan ang Splash Brothers apan dili ang kinatibuk-ang puwersa sa Golden State Warriors.
Ang host Warriors mingsandig sa ilang reserbang mga magduduwa aron ipanglampornas ang Cavaliers, 104-89, kagahapon sa Game 1 sa National Basketball Association (NBA) Finals sa Oracle Arena sa Oakland.
Ang kasamtangang MVP nga si Stephen Curry ug Klay Thompson igo lang nagkumboya og 20 puntos, 11 kang Curry ug siyam kang Thompson.
Apan bisan pa niini, ang defending champions nakamaneho gihapon pagkontrolar sa duwa gumikan sa maayong gipakita sa uban nilang mga magduduwa.
“I thought our guys did a great job of locking into those guys,” asoy ni Cavaliers coach Tyronn Lue. “Their bench played well. So we’ve got to go back to the drawing board and try to figure out how to take those guys out of the game.”
Gipangulohan ni Shaun Livingston ang kadaugan pinaagi sa iyang playoff career-high nga 20 puntos.
Aduna pa’y laing lima ka mga magduduwa ang Warriors nga ningmugna og double-digit nga puntos, timailhan lang sa balanse nilang ataki.
Si Draymond Green nidugang og 16 puntos alang sa Warriors, nitunol og 13 puntos si Harrison Barnes, nitampo og 12 puntos si Andre Iguodala, nihatag og 11 puntos si Leandro Barbosa samtang niamot og 10 puntos si Andrew Bogut.
“You don’t win championships without the entire squad coming in and making an impact on games,” matod ni Curry. “That’s why we’re here.”
Ang mga reserba sa Warriors ningdominar sa ilang kaparang sa Cavaliers sa pinuntosay, 45-10.
Sama sa gilauman, ang Cavaliers ningsalig og maayo sa ilang Big Three. Si Kyrie Irving maoy nangulo sa team pinaagi sa iyang 26 puntos, nitampo og 23 puntos si LeBron James samtang nihatag og 17 puntos si Kevin Love.
Apan gawas sa tulo, wala na’y laing magduduwa ang Cavaliers nga nakapakita og maayong duwa.
Ang Game 2 ipahigayon karong Lunes (RP time) sa balwarte gihapon sa Warriors ug sayod si James nga kinahanglan nilang mohimo og dakong adjustments ning duwaa.
“When you get outscored 45-10 on the bench and give up 25 points off 17 turnovers, no matter what someone does or doesn’t do, it’s going to be hard to win, especially on the road,” matod ni James. “Don’t matter what you do with Steph and Klay, don’t matter what you do with Draymond.”
Ning kombatiha, gipakita sa Warriors ang tukmang ehemplo sa ilang motto nga “Strength in Numbers” nga maoy nakapatik sa yellow shirts nga gipangsul-ob sa ilang mga dumadapig.Ninggamit og daghang mga magduduwa ang Warriors sa pagpusgay sa puwersa sa Cavaliers.
“We play a lot of people, and we feel like we have a lot of talent on the bench that can come in and score when we need it,” matod ni Warriors coach Steve Kerr.
“So it’s a great sign, obviously, that we can win in the finals without those two guys having big games, but it’s not really that surprising to us. This has been our team the last couple of years.”
Gipasabot ni Livingstone nga silang tanang mga magduduwa sa Warriors aduna’y pagsalig sa usa’g usa ug mao kini ang ilang usa sa labing lig-ong hinagiban.
“That’s our motto. That’s what we believe in,” matod ni Livingston. “We pick each other up. We believe in each other and we just fight.” AP/ESL