SOBRA sa P500,000 nga kantidad sa shabu ang nasakmit kagahapon sa alas 5:15 sa buntag sa terminal’s entrance sa Pier 1, dakbayan sa Sugbo.

Nasakpan si Edgar Luzon, 35, minyo, taga Barangay Labangon, dakbayan sa Sugbo human naratol dihang rikisahon unta sa mga gwardiya sa pantalan.

Si Chief Insp. Jose Gesto, hepe sa Waterfront Police Station, niingon nga si Luzon naratol dihang mosakay unta og barko paingon sa Ormoc City kagahapon sa kaadlawon.

Giingong girikisa siya apan kalit nga nidagan paingon sa gawas dayon nagdali sa pagsakay sa taxi nga gi-parking sa daplin.

Uwahi na siya kay nababagan sa mga port security ang agianan.

Iyang gibutyag nga kadudahan kaayo ang lihok ni Luzon.

Mismo ang taxi driver nga si Michael Malague, 39, wa maglangay sa pag-agni sa kapulisan pagpa-inspection sa sakyanan.

Ang shabu gibana-banang mokantidad og P600,000 nga gisulod sa dakong plastic bag nga nakuha sa kapulisan sulod sa taxi.

Ang taxi diha gi-park sa may duol sa Waterfront police station pipila lang ka metros ang gilay-on gikan sa Pier 1.

Matod ni Gesto nga dihang nababagan ang taxi sa mga port security, gipahibawo sila sa mga pulis nga nisusi sa sulod sa taxi nga nakuha ang dakong putos.

Si Luzon wa gilayon niangkon apan sa kadugayan nikompirmar nga siyay nagdala sa maong shabu.

Gibutyag niya nga di siya drug pusher kun di usa ka drug courier diin siya ang modala kay suhulan samtang dunay tawo nga mosugat kaniya sa Ormoc.

Sumala pa niya nga tungod kay way laing panginabuhian, napugos siya niini aron dunay ikahatag nga pagkaon sa iyang pamilya.

Samtang sa dakbayan sa Mandaue, tulo ka mga tawo ang gisikop sa kapulisan atol sa duha ka managlahing mga buy-bust operation niadtong Huwebes.

Ang mga suspek giilang mao sila si Jerry Cinco, 46, ulitawo ug Marisa A.

Pisaro, 45, minyo, parehong lumolupyo sa Lower Malibo B., Brgy. Subangdaku ug si German Maturan, 46, taga Sitio Ihawan, Brgy. Mantuyong sa dakbayan.

Unang nasikop mao sila si Cinco ug Pisaro mga alas 5 sa buntag.

Giingong si Cinco maoy gipalitan og usa ka pakete sa shabu ni PO1 Virtucio atol sa operasyon.

Nakuha gikan kaniya mao ang 14 ka gagmayng pakete sa shabu ug buy-bust nga kwarta balor og P200 samtang 15 ka tinfoil ug duha ka improvised lamp.

Si Maturan, sa laing bahin, nasikop atol sa operasyon nga gipangulohan sa hepe sa Centro Police Station nga si PSI Jimmy Fortes.

Gikatahong naatlan nga namaligya og shabu atol sa opersyon si Maturan nga nakuhaan usab og P100 nga kwarta nga maoy gigamit isip buy- bust money.