SUGDAN na sa pagpanghatag ang anti-dengue vaccine alang sa mga nag-edad og 9-anyos pataas dinhi sa Sugbo sa uwahing bahin sa sunod buwan.
Matod sa Provincial Health Office, bugtong ang Sugbo lang ang makadawat niini sa tibuok Central Visayas.
Gitug-an ni Provincial Health officer, Dr. Rene Catan, nga sa uwahing bahin sa buwan sa Marso na sugdan ang pagpanghatag sa DOH og libreng bakuna batok sa makamatay nga sakit nga dengue, alang sa mga nag-edad og 9-anyos pataas.
Bisan og wa pa hingpit nga nahuman ang pagtuon labot sa ka-epektibo sa maong bakuna, apan uyon si Catan nga masugdan na kini sa pagpanghatag ngadto sa mga batang Sugbuanon.
Matod niya, luwas kini ug dunay 65% nga effectivity, nga malikay sa sakit nga dengue ang mga madapatan niini.
Gipasabot sa PHO nga makahatag og “heard immunity” ang maong dengue vaccine, nga i-supply unya sa usa ka pribadong kompaniya.
Sigun ni Catan, kon dunay usa o duha sa pamilya nga nahatagan na og dose sa bakuna batok dengue, hayan dako ang posibilidad nga di makasiaw ang maong sakit diha sa ilang pinuy-anan.
Sa talaan sa PHO, sagad sa mga nataptan og dengue ug namatay tungod sa maong sakit, nag-edad og 8 anyos paubos. Problema karon kay di sila mahimong hatagan sa maong bakuna.
Dunay gihimong pagtuon labot sa nahisgutang dengue vaccine sa brgy. Guadalupe sa dakbayan sa Sugbo.
Gusto unta nga sayran una sa PHO ang resulta niini sa di pa ipanghatag ang bakuna sa kabataan sa probinsiya.
Apan giingong saNobiyembre pa mahuman ang maong pagtuon.
Ang Sugbo maoy kanunay dunay labing taas og mga kaso sa dengue kada tuig sa tibuok Central Visayas.
Sa tibuok Sugbo, ang Cebu City usab maoy kanunay nag-una sa talaan.