CEBU Coast Guard Station Commander Dionelitt Ampil nipahibawo nga nihatag na og go-signal ang district commander sa Coast Guard sa pag-umol og fact-finding committee alang sa ilang himuon nga Marine Casualty Investigation sa panagbangga sa fastcraft ug usa ka barko.
Ang fact-finding team langkuban kini sa 10 ka mga miyembro, diin apil na niini ang representante gikan sa Maritime Industry Authority (Marina 7).
Giklaro sab ni Ampil nga ang resulta sa ilang imbestigasyon magsilbi rang rekomendasyon ngadto sa Marina.
Ang ahensiya ra gihapon ang mopahamtang og silot sa shipping companies.
Basi usab sa marine protest sa fastcraft, kini nangatarungan nga way suga ang barge hinungdan nga wa kini nila mabantayi ug sila nibangga sa luyo sa barge.
Samtang sa marine protest sa barge, nagkanayon ang kapitan niini nga nahibulong sila nga gi-radyuhan sila sa fastcraft sa dihang nibangga na kini.
Nagkanayon hinuon si Ampil nga ilaha pang susihon kon kinsay nagsulti sa tinood sa duha, diin apil nga ilang susihon kun nilapas ba sa allowable speed ang MV St. Braquiel sa Mactan Channel ug kun anaa pa sa husto nga position ang barge alang sa rota sa mga inbound nga barko.
Samtang nangabot na ang mga imbestigador sa Marina gikan sa kaulohan kini aron sa paghimo ug imbestigasyon sa nahitabong panagbangga sa M/V St. Braqueil ug SMC Barge 8 sa Mactan Channel niadtong Sabado sa gabii.
Matod ni Atty. Andrew Dadola, legal officer sa Marina 7, nga ila na usab nga na-consolidate ang mga dokumento nga gikinahanglan alang sa himuong imbestigasyon.
Gawas sa pagsuspenso sa duha ka mga barko ug sa tugboat nga nagguyod sa barge, apil nga gipasuspenso ang lisensya sa mga tripulante ug kapitan niini.
Giklaro usab ni Dadola, nga kasong administratiba lang ang mahimo nilang ipahamtang batok sa duha ka mga shipping companies, hilabi na kon mapamatud-an nga dunay nahitabong pagpabaya sa maong aksidente sa Mactan Channel.