NAPUNGOT si Top Rank boss Bob Arum migawas ang taho sa United Kingdom nga hapit na’ng ma-finalize ang away nila ni Filipino boxing hero Manny Pacquiao ug British star Amir Khan.
Hinuon dili na kini bag-o alang kang Arum, kinsa makadawat og tawag sa telepono sa sayop nga taho kabahin sa negusasyon sa away nila ni Pacquiao ug Khan.
Wala’y kalainan kining bag-ong taho nga gihulagway ni Arum nga “total and complete bullsh*t.”
Matod pa nga ang away nila ni Pacquiao ug Khan ipahigayon karong Mayo 20 sa UK.
Si Arum, kinsa maoy promoter ni Pacquiao, nakignegusasyon sa kampo ni Australian Olympian Jeff Horn.
Kon asa na lang kini ipahigayon maoy wala pa’y klaro kabahin sa away.
“The Amir Khan story has come out of nowhere,’’ batbat ni Arum sa interbyu sa Courier Mail nga napatik sa www.boxingscene.com. “It is total and complete bullsh*t’’.
Sa orihinal nga plano, ipahigayon ang away nila ni Pacquiao ug Horn sa yutang natawhan sa Australian fighter sa Brisbane karong Abril 23.
Apan ning bag-uhay lang, daw nadani si Pacquiao nga ipahigayon ang away sa United Arab Emirates.
“What’s happening is that Manny is talking to these people in Dubai who have offered him an insane amount of money,’’ pasabot ni Arum.
“Whether (the offer) is real or not real — he is determined to explore it to see if it has any validity. That’s all I can say.’’
Sa miaging semana, ang adviser ni Pacquiao nga si Michael Koncz mianunsyo nga klaro nang ipahigayon ang away sa UAE ug nangayo pa kini og despinsa sa gobiyerno sa Australia.