GITATAW ni Mandaue City Mayor Luigi Quisumbing nga iya unyang i-endorso sa konseho sa dakbayan ang di na pagpaapil sa business permit nga lukaton sa mga traysikol drayber gawas sa pagkuha niini ug prangkisa sa dakbayan.
“I will endorse that in the council that we will waive that business permit requirement,” pahibawo ni Quisumbing sa mga tigbalita.
Kahinumduman nga sukad sa milabayng semana, ang pangulo sa Traffic Enforcement Agency of Mandaue (TEAM) Glenn Antigua nakigtagbo sa mga hugpong sa mga traysikol drayber sa Canduman, Cabancalan ug Labogon aron pagtudlo niini sa balaod trapiko ug pagkuha ug prangkisa sa dakbayan sa di pa kini mohimo ug “total crackdown” sa mga kolurom nga mga traysikol sa dakbayan.
Atol sa panagtagbo, ang mga drayber nipadayag usab sa ilang concern nga mura og nadoble na ang ilang paglukat og permiso sanglit gawas sa prangkisa, mokuha pa man sila og business permit sa city hall.
Tungod niini, nakadesider si Quisumbing nga di na unya ipaapil og lukat ang business permit sa mga drayber tungod sa prangkisa nga gikuha niini.
Apan si Quisumbing nagkanayon nga ang tahas kinahanglan og gahum sa konseho sa dakbayan aron nga maamendar ang ordinansa kalabot sa pagdagan sa mga traysikol sa dakbayan.
“Anything that I can do to make it easier to bitaw nga molukat ug permits diri sa city halll, I will support that 100% so if we can work it out nga di na kinahanglan molukat ug business permit instead franchise nalang,” matod ni Quisumbing sa mga tigbalita.
Gawas sa business permit sa mga traysikol sa dakbayan, si Quisumbing niingon nga may mga nabantayan siya nga pagbalikbalik sa business permit processing sa city hall maong sa kasamtangan iya kining gitun-an unsaon nga kini mawagtang sa sunod nga pag-renew sa mga permiso sa city hall.
Paambit usab ni Quisumbing nga sunod semana, iyang himamaton ang tanang mga miyembro sa asosasyon sa mga traysikol drayber sa dakbayan ug hisgutan nila ang paglibkas niini sa pagkuha ug business permit gikan sa city hall.
Sumala pa ni Quisumbing nga iyang nabantayan nga naglisod paglukat og prangkisa ug business permit ang mga traysikol drayber sa dakbayan.