MOLANAT pa og 30 ka adlaw sa dili pa hingpit mapawaybili ang kontrata tali sa Cebu City Government ug Filinvest Land Incorporated (FLI) sa 19.2 ektaryas nga yuta sa South Road Properties (SRP).
Kini ang pagbanabana ni Mayor Tomas Osmeña human nipadayag na ang FLI sa pagkanselar sa kontrata nga ilang gisudlan gumikan sa pagkapakyas sa city government paghatag sa titulo sa yuta nga nalatid sa provision.
Ang mayor nagkanayon nga nahibawo usab siya nga magkinahanglan kini og pagtugot sa konseho kon sa higayon mohukom ang city government sa pagkansela sa kontrata tali sa duha ka habig.
Gipadayag niya nagpadayon ang City Legal Office ug mga abogado sa paghiusa sa ilang mga dokumento para sa kalampusan sa pagbakwi sa kontrata.
Konsehal Joey Daluz III sakop sa Team Rama nagkanayon nga base sa iyang obserbasyon napugos ra ang FLI sa pag-rescind sa kontrata sa ilang habig gumikan sa pressure gikan ni Osmeña.
Laing kaalyado sa Team Rama nga si Konsehal Raymond Garcia kinsa usa ka abogado niingon nga dili makabarog ang siyudad kon wala ang konseho hinungdan nga nagkinahanglan kini sa partispasyon sa city council.
Si Osmeña niingon nga andam siya motubag sa mga pangutana sa mga sakop sa Konseho sa hustong panahon aron iyang mapasabot ang iyang habig.