GIILA sa silingan ang laing suspek pagpamusil patay nga nahitabo sa Daumar–Yacapin Street, dakbayan sa Cagayan de Oro niadtong niaging adlaw.

Aduna na’y mipatim-aw nga ngalan sa nagmaneho sa motorsiklo sa napatay nga mga suspetsado apan dili pa mabutyag sa kapolisan.

Matud ni Cogon Police Station 2 Investigator Apollo Neil Delas Alas nga giila sa iyang mga paryente ang usa sa mga namatay nga suspek human gipusil si Mawi Batuintan, ang sinaligan sa Jabar Ukay-ukay.

Ang ngalan nga migawas sa imbestigasiyon sa kapolisan mao ang alyas Bebot Hererra, 47, biyudo ug residente sa Barangay 13 ning dakbayan, kinsa giingong kanhi na mitahan sa tokhang sa Police Station 1 sa Divisoria.

“Naa pa mi gipaabot nga maka-validate kay naa nami picture sa iya (Bebot Hererra) murag match man sa picture sa cadaver driver motor. Kana naa gyud mo identify nga parenti para ma validate nato, dili pa gyud ko mo confirm kay basin masayop ta dili na raba nato mabawi dayon,” pahayag ni Delas Alas.

Aduna’y mipatim-aw usab nga mga taho nga si Bebot Hererra ang usa sa mga Jhon Doe niadtong Enrique “Kiking” Fernandez III kidnapping and carnapping case kinsa usa sa mga asset sa lima ka mga pulis nga nahilambigit sa maong krimen apan wala pa kini gikompirma sa mga otoridad.

Kahinumduman nga patay si Batuintan sa pagpamusil samtang patay usab sa duha nga namusil niini nga wala pa masayri ang responsable.

Ang mga namatay nga duha ka suspek pagpusil kang Bautintan naila nga sila Raymond Villanueva ug Bebot Hererra, gituohang gun for hire.

Sa pagkakaron, padayon pa ang mga otoridad sa pag-ila sa mga suspek ilabi na sa usa nga naka-ikyas kinsa kauban sa mga nakamotorsiklo lakip na ang mga nakapusil usab niini. (KCS)