GIKATAKDANG hulipan ang hepe sa Police Station 2 sa Cogon human sa nahitabong pinusilay sa ilang area niadtong niaging adlaw nga ningkalas og tulo ka mga kinabuhi.

Kini human sa taho nga mas una pa ang personahe sa Police Station 9 sa Macasandig sa area kay sa mga polis sa Cogon.

Nasayran nga aprobado na sa konseho sa dakbayan ang resolusiyon nga hulipan si Police Chief Inspector Gilbert Rollen human giingong tataw nga aduna kini kakulangon hinungdan sa mga nahitabong krimen sa maong dapit.

Sa pahayag ni Kagawad Eric Salcedo nga mi-uyon kini nga hulipan ang maong hepe gumikan kay walay mga personahe sa kapolisan nga gipakaylap sa maong area hinungdan nga adunay mga krimen nga gakahitabo.

Apan giklaro ni Police Station 9 Chief Julius Saluta dihang gihinabi sa SunStar SuperBalita nga dili tinuod nga mas una pa ang iyang mga sakop sa area atol sa hitabo.

Gibutyag ni Saluta nga anaa siya sa Cogon kay dunay gipalit dihang nahitabo ang insidente hinungdan nga nakapanawag siya sa iyang mga sakop nga bak-apan ang kapolisan sa Cogon.

Sa pagkakaron, giingong nagpaabot pa ang kapolisan sa kopya sa resolution sa konseho kalabot na sa sugyot nga hulipan si Rollen.