DUL-AN sa 200 ka mga New People’s Army (NPA) ang mipahigayon og checkpoint niadtong Martes, Pebrero 21, sayo sa buntag sa national highway sa Purok 4, Barangay Pahindong, dakbayan sa Medina, Misamis Oriental.

Gikumpirma ni Medina Mayor Donato “Jan-Jan” Chan nga moabot ngadto 30 minutos ang pag-checkpoint ug mapasalamaton lamang siya nga walay gidala, gidagit ug gipasakitan nga mga sibilyan.

Gibutyag sab niini nga igo lamang gihinabi sa mga NPA ang mga opisyales sa barangay ug human niini miatras ug namalik ra usab sa bukid nga bahin.

Dugang ni Mayor Chan nga gipangpara sab ang mga sakyanan ug adunay gipangsusi apan wala gika-report nga adunay gipangkililan ug ingon man gipangkuhaan og gamit.

Sa iyang bahin ni 58th Infantry Battalion Commander Francis Carandang nga posibleng naipit sa laing lugar ang mga NPA tungod sa sunod-sunod nga military operation hinungdan nagpakita kini sa maong lugar aron posibleng mabalhin ang atensyon sa mga sundalo.

Gibutyag sab ni Carandang nga duha ka platoon gikan sa Guerella Front 4B ang mga NPA nga nagcheckpoint ubos sa giingong pagpangulo ni Kumander Manseguiao.

Gawas sa paghinabi sa kapitan sa maong barangay giingong nanghadlok pa sa mga residente ug giingong nangisnak pa sa basketbolan sa dapit ang mga sakop sa NPA.