NING adlawa atong ihulip kining titulo nga RATSADA (to include everyone) sa atong lindog sanglit apil ang tanang isyu dinhi matag semana.

Ug ning adlawa, atong hisgutan ang kalit nga pagbaliktad ni retired Senior Police Officer 3 Arthur Lascañas nga nagduhig sa atong pinangga nga Presidente Rodrigo Duterte nga maoy nagsugo nila nga patyon ang mga kriminal ug mga kontra, lakip na suspek sa kidnapping, ug kritikal nga komentarista sa radyo nga si Jun Porras Pala.

Ang pahayag ni Lascañas, sukwahi sa iyang gipanumpaan sa Senado nga milimod sa akusasyon sa miangkon nga sakop sa Davao Death Squad (DDS) nga si Edgar Matobato.

Apan sa wa damha niadtong Lunes, giangkon ni Lascañas nga tinuod ang DDS nga maoy nagpaluyo sa pagpamatay bugti sa dakong kantidad nga gibayad kanila sa kanhi mayor ug karon Presidente na sa nasud.

Human sa maong rebelasyon, ang kampo ni Pangulong Duterte nagpahayg nga usa ka “demolition job” kini sa ilang kontra sa politika.

“The demolition job against President Duterte continues,” suma ni Communications Secretary Martin Andanar.

“Our people are aware that this character assassination is nothing but vicious politics orchestrated by sectors affected by the reforms initiated by the Duterte administration,” dugang niya.

Gani, giingon pa niya nga dunay $1,000 nga gibayad sa mga tigbalita, butang nga gikasuko sa mga reporters nga nadestino sa Senado.

Gawas kang Andanar, midepensa sab ang mga netizens pinaagi sa pagsulti nga si Lascañas gibayran og dakong kantidad sa grupo nila Senador Antonio Trillanes IV.

Apan kung si Lascañas pa ang pasultihon, iya kadtong gihimo tungod kay misaad siya sa Ginoo nga mohimo sa usa ka public confession tungod kay gitulisok na siya sa iyang konsensya.

Kon ang mga dumadapig sa atong Pangulo ang pasultihon, bakakon si Lascañas kinsa nagpagamit sa mga tawo nga apektado sa mga reporma nga gipatuman sa Pangulo.

Ning hitaboa, di ako maghukom kung kinsa ang nagsulti kanila sa tinuod sanglit akong gikonsidera ang tanan nga giakusahan nga inosente hangtud nga di pa mapamatud-an nga sad-an sa korte.

Di ako maghukom nga tinuod ang pasangil sa kanhi pulis ug di sab ako magkahukom nga gibayran siya, labaw na ngadto sa Pangulo.

Sa mga nagtuo nga bakak ang gipanulti ni Lascañas, ayaw kamo kabalaka tungod kay dunay sikat nga panultihon ang kanhi propagandista ni German leader Adolf Hitler nga si Joseph Geobbles nga "There will come a day, when all lies will collapse under their own weight, and truth will again triumph."

Buot niyang ipasabot nga moabot ra ang adlaw, dihang ang tanang bakak mahugno sa iyang kaugalingon nga gibug-aton, ug ang kamatuoran na usab ang magmadaugon.

Kon si kinsa man ang nagsulti kanila og bakak, nagtuo ako nga mogawas ra gayud ang kamatuoran subay sa kabubut-on sa Labaw nga Makagagahum.