GILUSAD karon sa atong kapulisan ang kampanya batok sa illegal nga sugal dinhi sa Pilipinas. Human kini sa pagsuspenso si Presidente Rody Duterte sa gubat batok sa illegal nga drugas.

Ginaingon nga hilabihan gyud sa pagkasugarol sa mga Pilipino. Bisan gani ang mga piniriso nga natanggong gumikan sa illegal nga sugal, magsugal pa man gani, matod pa sa usa ka estorya.

Ang Art. 195-199 sa Revised Penal Code, as amen­ded, Republic Act No. 3063, Presidential Decrees Numbered 483, 449, 510 ug 1306 ug ubang mga balaod gi-repeal sa P.D. 1602 nga giluwatan niadtong Hunyo 11, 1978 nga nagpahamtang sa mas bug-at nga silot alang sa illegal nga sugal.

Ang P. D. 1602 nagsilot sa tanang matang sa illegal nga sugal sama sa tigbakay, horse racing ug bookie operations, game fixing, cara y cruz, pompiang ug uban pang sugal ginamit ang dice, black jack, lucky nine, poker, monte, baccarat ug ubang sugal ginamit ang baraha, mahjong, domino, slot machines, roulette, pinball, dog racing, boat racing, car racing ug uban pang mga kalihokan nga gisugalan o gipustahan.

Republic Act No. 9287 nga nagpahamtang sa mas bug-at nga silot sa illegal numbers game sama sa jueteng, last two, jai-alai o masiao ug sa illegal nga swertres.

Ubos sa RA 9287, ang bettor o mosugal sa illegal numbers game pahamtangan sa silot nga pagkabilanggo gikan sa 30 ka adlaw ngadto sa 90 ka adlaw. Ang kawani sa illegal numbers game operation silotan og pagkabilanggo gikan sa unom ka tuig ug usa ka adlaw ngadto sa walo ka tuig.

Samang silot ipahamtang niadtong mopagamit sa iyang sakyanan, panimalay o building sa illegal numbers game operation. Ang collector o ahente pahamtangan sa silot nga pagkabilanggo gikan sa walo ka tuig ug usa ka adlaw ngadto sa 10 ka tuig. Samtang sa coordinator, controller o supervisor prisuhon gikan sa 10 ka tuig ug usa ka adlaw ngadto sa 12 ka tuig.

Ang maintainer, manager ug operator sa usa ka illegal numbers game silotan og pagkabilanggo gikan sa 12 ka tuig ug usa ka adlaw ngadto sa 14 ka tuig, samtang ang financier o kapitalista prisuhon og 14 ka tuig ug usa ka adlaw ngadto sa 16 ka tuig. Ang protector silotan sa pagkabilanggo gikan sa 16 ka tuig ug usa ka adlaw ngadto sa 20 ka tuig.

Kon ang collector, agent, coordinator, controller, supervisor, maintainer, manager, operator, financier o capitalist sa bisan unsang illegal numbers game usa ka kwani o opisyal sa gobyerno, tinudlo o pinili, pahamtangan siya sa islot nga pagkapriso gikan sa 12 ka tuig ug usa ka adlaw ngadto sa 20 ka tuig ug multa gikan sa P3 milyunes ngadto sa P5 mil­yunes ug perpetual absolute disqualification from public office.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)