GIHULAGWAY ni Presidential Assistance for the Visayas Michael Dino nga dili na ‘business friendly’ ang dakbayan sa Sugbo. Kini nunot niining pagpanggukod nga gihimo sa ‘kanhi laos nga pulitiko’ sa mga dagkong negosyante nga nakapalit og luna diha sa South Road Properties (SRP). Tinuod na, 101 per cent kong mosuporta niining obserbasyon ug opinyon ni Dino, kinsa usa usab ka negosyante sa wala pa gitudlo ni Pres. Duterte sa iyang posisyon sa pagkakaron.
Dili maayo kining gihimo karon sa ‘kanhi laos nga pulitiko’ nga pagpanggukod sa SM Prime Holdings, Filinvest ug Ayala Land Inc,. Ang maong tulo ka mga dagkong developers maoy nakapalit og luna sa SRP sa panahon sa administrasyon ni kanhi Mayor Mike Rama nga maoy gikasuko aning tawong yabag diha sa City Hall. Personal ang motibo niining iyang lakang. Iyang gustong pasirad-an ang Banco de Oro branches dinhi sa dakbayan gumikan kay kining maong bangko iya man usab sa SM Prime Holdings. Apan ang Banco de Oro midangop ngadto sa korte ug nakakuha og temporary restraining order.
Gumikan sa kabalaka nga mahitabo usab kanila ang nahitabo sa Banco de Oro, ang Filinvest napugos sa pag-rescind o pagkanselar o anular sa kontrata tali sa Siyudad. Ang Filinvest maoy nanag-iya sa East West Bank nga gihulga usab nga pasirad-an. Ang Bank of the Philippines Islands (BPI) nga gipanag-iya sa Ayala mao usab ang posibleng dangatan. Kini gong mga dagkong kompaniya dili gusto og samok mao nga moduko lang sila ug magpa-awot aning kapritso aning tawong yabag.
Pero para nako kon legal ug tinarong kining mga negosyo ning maong mga kompaniya, nganong dili man nila suklan? Kon nagsunod sila sa insakto ug walay binoang ang ilang mga negosyo, nganong magpabunal man lang sila? Dili diay sila makadangop ngadto sa korte?
Alang kanako sobra na kining gihimo niining ‘kanhi laos nga pulitiko’. Makapa-islag kini sa mga negosyante nga gustong mobubu og pahunan dinhi sa dakbayan. Wala lang niya huna-huna unsa ang mamahimong implikasyon niini. (bobby@sunstar.com.ph)