MOABOT man o di si Presi­dente Rodrigo Duterte, mahinayon ang groundbreaking alang sa ikatu­long taytayan nga mokonektar sa dakbayan sa Sugbo ug lungsod sa Cordova.

“We are not that sure nga moanhi ba gyud si President (Duterte), although ingon siya nga moanhi siya. That will depend on his schedule,” mao kini ang gibutyag ni Cordova Mayor Mary The­rese Sitoy-Cho.

Sunod semana, Marso 2 gikatakda nga himuon ang groundbreaking sa Pilipog Bridge sa Barangay Pilipog, Cordova.

Gibutyag usab ni Cho nga nahuman na ang dokumentasyon sa taytayan ug anaa na sila karon sa proseso sa marking niini.

Gipahibawo usab sa ma­yor nga gikan sa P17 bilyones, nisaka ang kantidad niini ngadto sa P22 bilyones.

Tulo ngadto sa upat ka tuig himuon ang maong bridge diin molanat na lang og minutos ang biyahe gikan sa dakbayan sa Sugbo paingon sa tugpahanan sa Mactan.

Gibutyag usab ni Cho nga dunganon pagtrabaho ang bridge sa habig sa Cordova ug sa dakbayan sa Sugbo.

Gawas nga alternatibo na unya kini nga paingnan sa Mactan Cebu International Airport (MCIA), matod sa mayor, nga mas duol na usab ang Cordova sa siyudad ingon man alang sa mga tourist destination sa ilang lungsod.

Gipahibawo hinuon ni Cho nga tungod kay Public-Private Partnership kini, aduna kini toll fee nga paga­kolektahon sa matag moagi nga sakyanan. Ubos sa pagdumala sa Metro Pacific Tollways Development Corp. (MPTDC) moabot ngadto sa ang 4.76 kilometros ang gitas-on niini.