SIKOP ang tulo ka mga suspek kinsa adunay warrant of arrest atol sa gipahigayong pagtunol sa tinugyanan sa kapolisan gikan sa Police Station 1 sa Divisoria ning dakbayan sa Cagayan de Oro lunot na usab sa pagpatuman sa “one time, big time operation” sa mga otoridad.

Malampusong nasikop sa kapolisan sila si Mia Sandoval, alyas Mia Estella Buenaventura, 47, minyo nga taga Bontong-Palawan, Camaman-an ning dakbayan; Maria Lopez alyas Maria Montessa Noval Dumpa, 43, dalaga nga taga Phase 2, NHA, Kauswagan ning dakbayan.

Sa nahipos nga impormasiyon gikan sa Police Station 1, nasayran nga adunay kasong robbery with intimidation ang mga suspetsado diin gi-isyu ni Honorable Henry Damasing, presiding judge sa Regional Trial Court (RTC) Branch 24 ning dakbayan nga adunay piyansa nga P100 mil alang sa temporaryo niini nga kagawasan.

Samtang malampuson usab nga nasikop ang laing suspek nga adunay warrant of arrest nga mao si Roldan Dela Cruz, alyas Angel Dela Cruz, 35, ulitawo ug netibo nga taga Doongan, Kagay, Butuan City.

Ang maong kaso gi-isyu ni Honorable Marites Filomena Rana-Bernales, presiding judge sa RTC Branch 39 diin adunay piyansa nga P40 mil alang sa temporaryo niini nga kagawasan.

Sa pagkakaron, ang maong mga suspek ang kasamtangang anaa na sa tinugyanan sa kapolisan alang sa tukmang disposisyon.