ANAA na sa pagkadugta ang patay’ng lawas nga napalgan didto sa Agutayan Island niadtong Miyerkules sa buntag, Pebrero 22, sa dakbayan sa Jasaan, Misamis Oriental.

Unang missing si Jebe Lumintad Osero, 23, ulitawo, taga dakbayan sa Manolo Fortich Bukidnon niadtong nasinati ang kusog nga pag-ulan niaging semana Pebrero 16 dihang giingong nangisda kini sa suba sa dakbayan sa Tagoloan, Misamis Oriental.

Gikumpirma sa Misamis Oriental Provincial Disaster Risk Reduction Management Council nga si Jebe ang lalaking napalgan niadtong Miyerkules.

Gibutyag sa kapolisan sa Jasaan Police Station nga nakita sa mananagat nga mao si Renato Villaruz ang biktima nga naglutaw doul sa Agutayan Island apan giguyod kini paingon sa Barangay Bobuntugan susamang dakbayan.

Anaa na sa pagkadugta ang patay’ng lawas ug brief na lamang niini ang nahibilin nga sapot.

Sukad na missing si Osero gipangita kini og maayo sa iyang pamilya ug ngani duha ka adlaw ang gihimong sa mga rescue team aron makita ang lawas niini.

Sa pagkakaron, nahidangat na sa lungsod ang pamilya sa biktima aron kuhaon ang patay’ng lawas niini.