NAGBITAY na lamang nga naabtan sa asawa ang iyang bana kinsa naghikot og nylon sa kaugalingong liog niadtong Martes, Pebrero 21, alas 4:55 sa hapon diha sa Eagle Street, Zone 1, Barangay Kauswagan ning dakbayan sa Cagayan de Oro.
Patay ang biktima nga nailang si Eugenio Velez, 66, minyo ug kinsa giingong naghambin sa sakit nga tuberculosis sulod na sa pito ka tuig.
Sa impormasiyon gikan sa Police Station 4 sa Carmen gikabutyag nga napalgan na lamang sa asawa ang biktima nga nagbitay na kinsa naghikot sa kaugalingong liog ginamit ang nylon nga pisi.
Subay pa usab sa asawa nga nilakaw una kini kay nangita og pagkaon apan sa pagbalik nakurat na lamang kini sa iyang nasaksihan nga nagbitay na ang bana.
Gani nianang gabii nga nag-estorya nagsige na matud pa kini og litok og “patay” nga iya pa kining gibadlong.
“Nangita man ko’g pagkaon kay wa ma’y kan-on lage, nakakita man ko, alas 4 nako kauli... nagbitay naman siya, naghisgot nga patay... patay... patay... ingon ko nga Genio ayaw pag-ingon nga patay kay mahadlok raba ko, na di nako mouli sa balay,” pahayag sa asawa nga si Nilda Fe Velez, 64.
Wala’y nakitang foul play sa kamatayon sa biktima kinsa wala na usab gipailalom sa otopsiya base na usab sa hangyo sa asawa ug pamilya.
Human sa maong panghitabo gidala gayud dayon sa pamilya ang patay nga lawas sa punerarya alang sa tukmang disposisyon.