DILI pa masuta sa mga residente sa Barangay Mambaya-an dakbayan sa Balingasag, Misamis Oriental kon unsa na usab nga klase sa isda ang nakita sa baybayon sa dakbayan.
Usa ka Maricel Baloc, residente sa maong dakbayan, ang nag-post sa iyang Facebook account sa hulagway sa dakong isda nga nakita niadtong Miyerkules sa buntag, Pebrero 22.
Caption ni Taboc sa hulagway: “what a rare fish caught by the fishermen at Mambayaan, Balingasag province of Misamis Oriental.”
Gilakipan pa niini og hashtag nga “God be with us always.”
Miani kini og daghang reaksyon ug daghan na usab ang shares ang maong hulagway.
Pipila ka mga nakabasa sa post mikomento nga susama kini sa isdang “pakol” apan duna sab miingon nga mao ra og “butete” nga gibana-banang adunay gibug-aton nga 100 kilos.
Wala pay mihatag og ekplanasyon kon unsa kini nga klase sa isda apan gikonsidera kining talagsaon sa mga residente gumikan kay wala kini sukad makaplagi sa dapit sa pipila ka katuigan.
Kahinumduman nagsugod ang mga kabalaka sa katawhan dihang usa ka oarfish ang napalgan dinhi sa dakbayan sa Cagayan de Oro.
Daw basin ang pagkakaplag sa laing matang sa isda ang prediksyon na usab sa gitouhang linog.
Apan sa iyang bahin ni Misamis Oriental Governor Yevgeny Emano gibutyag niini nga dili siya motuo sa mga tinouhan sa pipila kalabot sa mga nanggawas nga dagkong isda.
“Dili ko motoo kay naa tay Ginoo. Tinoud man kini o dili mangandam atong probinsya kanunay sa unsa man nga mga katalagman nga moabot sa atong probinsya,” matud ni Emano sa SuperBalita.
Dugang sab ni Emano nga pinaagi sa Provincial Disaster Risk Reduction Management Department anaa kanunay nga motubag sa unsa man nga mga katalagman o kalamidad nga moabot.