MARAGUSAN, Compostela Valley Province -- Nailhan na sa kapulisan ang mga minero nga biktima sa pagpamusil didto sa Purok Gemilina, Barangay Pamintaran.
Unang giila ang mga biktima nga mao si alyas “Lito,” alyas “Arjay” ug alyas “Bunso.”
Apan sa gihimong imbestigasyon sa kapulisan sa Maragusan Municipal Police Station, giila ang mga biktima sa tinuod nilang bansagon nga sila si Manolito Castronuevo, 33, Jestoni Macpao (alyas Bunso), ug Liboy Macpao (alyas Arjay), 27, nagpuyo sa Purok 6, Sityo Pong-pong, Barangay Andap, New Bataan.
Ang imbestigasyon ni Police Officer 1 Dianne Claros sa Maragusan Municipal Police Station nagkanayon nga alas 4:40 sa hapon niadtong Huwebes, Pebrero 16, mga biktima nangape sa lugar dihang miabot ang napulo ka mga armadong lalaki.
Walay daghang istorya, gitabangan pagpusil sa mga suspek ang mga biktima sa makadaghang higayon ug paspas nga miiktad paingon sa wala matinong direksyon.
Mga biktima daling gidala ngadto sa Compostela Valley Provincial Hospital sa Barangay Poblacion apan nakabsan sa kinabuhi si Jestoni ug Liboy.
Samtang pabilin pang nagpaalim sulod sa Davao Regional Medical Center sa Apokon, Tagum City si Castronuevo sa naangkon niyang mga samad.
Narekober sa mga pulis gikan sa nahitaboan ang tulo ka basiyo sa bala sa kalibre .45 nga pistola nga gisumite na ngadto sa Provincial Crime Laboratory alang sa ballistic examination.
Sa pagsuwat niining balita, wala pay matumbok ang kapulisan sa mga suspek sa pagpamusil.
Samtang hustisya ang gisinggit sa pamilya ug kabanay sa mga biktima.