Davao Occidental guv seryuso sa kampanya batok druga

DAVAO OCCIDENTAL -- Seryuso ang gobernador sa probinsiya sa tinguhang malimpyo ang ilegal nga druga subay sa mando ni Presidente Rodrigo Duterte.

Si Governor Claude Bautista nagbutyag nga wa siya mag-komedya sa iyang bahad nga posibleng mabalhin ang adlaw'ng natawhan sa mga tawong gahi og ulo ugaling di moundang sa paggamit og druga.

"I am very serious. I don't give a damn," si Bautista nagbutyag atol sa gipatawag nga press conference kuyog ang Davao Media Miyerkules sa buntag, Pebrero 22.

Matud ni Bautista nga anaa na sa ilang kamot ang mga impormasyon sa mga tawong nagagamit og ilegal nga druga ug nakahibawo sab siya kon kinsa ang mga nitahan nga subling mibalik sa paggamit niini.

Samtang gipaneguro sa gobernador nga dili makahimo og shabu laboratory ang mga investors ilabi na ang mga Chinese nga buot magtukod og negusyo sa duha ka mga industrial zone sa bag-ong probinsiya.

Sa pikas bahin, gitataw sa mga personahe sa Philippine Drug Enforcement Agency (PDEA) nga nagpadayon pa ang drug test sa tanang kabarangayan ug di pa nila masulti kon adunay mga opisyal sa barangay nga nag-positibo, sulti ni Mildred Romero, opisyal sa PDEA.

Matud sa PDEA nga dili kaayo daghan ang nakagamit og shabu sa lugar ug mas daghan ang marijuana sanglit pulos bukirong bahin ang probinsiya ug duol sab sila sa Kiblawan, Davao del Sur, diin anaa ang plantasyon sa marijuana.

Gipasalig sab 73rd Infantry Battalion (IB) sa Philippine Army nga hugtanon nilang gibantayan nga di makasulod ang druga sa ilang mga area of responsibility.

Wa sab gikompirma ni Lieutenant Colonel Marion Angcao, 73rd IB commander, ang taho nga ang mga rebeldeng New People's Army ang naga-protekta sa mga plantasyon og marijuana sa Davao del Sur.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph