HAGONOY, Davao del Sur -- Blangko pa ang kapulisan sa Hagonoy Municipal Police Station (MPS) sa pagpusil-patay sa usa ka lalaki nga mitambong sa lamay sa patay.
Si Police Senior Inspector Susana Buenaflor, hepe sa Hagonoy MPS, nag-ila sa biktima nga si Noel Villaluz, 45, nagpuyo sa Campo 10, Barangay Guihing, Hagonoy, Davao Del Sur.
"Personal grudge palang atong gitan-aw nga hinungdang sa pagpusil, ug padayon pa ang atong imbestigasyon," sulti ni Buenaflor,
Giingon niya nga mitambong og lamay ang biktima alas 9:10 sa gabii niadtong Martes, Pebrero 21, sa Sitio Budoy, Barangay Guihing.
Nasayran nga dihang pauli na unta ang biktima, gipusil kini sa duha ka wa pa mailhing mamumuno nga nakasakay sa motorsiklo.
Ang biktima nakahiagom og duha ka pinusilan sa ulo ug usa sa abaga gamit ang .45 kalibre nga pistola nga miresulta sa iyang hinanaling kamatayon.
Ang patay nga lawas sa biktima gidala na sa lokal nga punerarya sa dapit.