AKOY giluod sa pamahayag sa ‘kanhi laos nga pulitiko’ nga dili siya ‘anti-business ug anti-poor’ kun dili ‘anti-corruption ug anti-crime.’ Mao kini ang iyang reaksiyon sa pamahayag ni Presidential Assistant for the Visayas Michael Dino kinsa mihingalan kaniya nga ‘bully’ o morag maton gumikan sa iyang pagpanggukod sa mga dagkong negosyante. Gikugod ug gilutos niining ‘kanhi laos nga pulitiko’ ang dagkong developers, ang SM Prime Holdings, Filinvest Land Inc., ug ang Ayala Land Inc., kinsa namalit og luna sa South Road Properties (SRP) sa panahon ni kanhi Mayor Michael Rama.
Unsa ‘anti-corruption’ siya? ‘Anti-corruption’ sa iyang mata? Kinsa man siya kaniadto sa wala pa siyang mahimong mayor dinhi sa dakbayan niadtong 1988? Sa didto pa siya sa Amerika, namaligya lang na siya og kaldero didto. Unya pila pa lang ka tuig nga nahimo siyang mayor, siya na dayon ang gideklarar sa usa ka magazine nga pinakadatu nga mayor sa tibuok nasud. Pagkadali bang nadatu? Kadtong iyang pagdawat sa duha ka mga mahalong sakyanan sa Big Foot nga napalit kuno sa iyang pag-umangkon, dili to kurapsiyon?
Giunsa niya pagbaligya ang mga lote didto sa SRP? Kanang gitukuran karon sa SM Seaside nga iyang gigukod. Nueve mil pesos lang ang kada metro kuwadrado niana unya ang city government pa maoy nagbayad sa capital gains tax. Unya wala gipaagi og official bidding. Si Mike Rama isip acting mayor niadtong tungura maoy nagpirma sa kontrata kay on leave siya niadtong tungura kay didto siya sa Houston sa Estados Unidos. Hapit na siya operahi sa iyang urinary bladder cancer apan miuli siya atol sa pagbayad sa SM. Unsa may iyang gi-uli unya mibalik sab dayon sa Amerika? Duna siyay gidawat? Kahilas god niya.
Daghang nakakuwarta sa pagtukod sa SRP. Pila ka cubic meter o dump track sa anapog ang giyabo diha. Kon ang nagpasiugda niana mangayo lang og P10 matag cubic meter sa suppliers sa anapog, pila ka milyon kaha ang nakuwarta? Di na lang ta magminaot. Ipalukot nang SRP ug dad-a sa langit imo kay imo man kaha na? (bobby@sunstar.com.ph)