BAYBAYON nga may brown ug puti nga bas, maanindot nga mga isla lakip na ang mga kabungturan ug porma sa mga bato inubanan sa berde nga umahan ug kalasangan maoy mosugat kanimo sa mabihagong lungsod sa Cantilan, Surigao del Sur.
Gidagsa ang dapit sa mga turista nga di buot nga dunay daghan tawo apan ilang matagamtaman ang kanindot sa kalikupan.
Ang Cantilan naila sa “brown sand bay” nga nag-atubang sa mga nagkadaiyang isla nga maayo kaayo alang sa island hopping ug snorkeling.
Kasagaran sa mga isla nga nasakop ning lungsod gideklarar nga marine protected areas.
Pipila sa mga naila nga isla naglangkob sa Ayoke Island, Casarica Island, Libtong Cove, Isla Encantada ug ang Bill’s Sanctuary o ang Injakan Island.
Ang Ayoke Island maoy dapit nga panagatan diin may 700 ka mga tawo nga nagpuyo niini. Giisip kini nga marine sanctuary apan ang luyo sa isla maoy surfing area alang niadtong mga nagsugod pa diin nagpangamay ang mabulokon nga rock formation.
Naila usab sa puti nga bas ang Casarica Island diin anaa niini ang mga nindot nga mga payag. Daghang mobisita sa dapit alang sa snorkeling.
Alang niadtong mga turista nga buot mag-diving, snorkeling ug kayaking sa naila nilang Blue Lagoon haum kaayo ang Libtong Cove, usa sa mga isla sa General Island.
Maayo usab nga bisitahon ang Isla Encantada, gamay ning isla nga daw sa gihulma ang mga bato diin may usa ka puti nga balay haum kaayo usa ka pamilya buot mag-overnight. Mamahimo usab og magbutang kag mga tent sa gawas nga bahin sa balay.
Samtang ang Bill’s Sanctuary o Inijakan, usa kini ka sanktuwaryo nga pribadong gidumala sa William K. Hotchkiss Foundation, Inc. alang sa pagbaton ug pagpreserbar sa isla. Daghan usab makat-unan sa dapit ang kabataan ug hamtong kon marine diversity ang hisgutan.
Adunay daghang klase sa isda, bat, star fish ug tuyom ang dapit.
Gawas niini, ang isla adunay hapit moabot 100 ka mga klase nga langgam gawas sa mga tikarol ug ang talagsaong klase sa langgam sa Pilipinas nga anaa sa kabungturan, ang Kalaw.
Makita kining mga mananap panahon sa sayong buntag ug lawom nang kahapunon. Adunay mga seawall ug fish nets nga anaa gibutang sa entrada sa dapit aron maprotehian ang mga mananap nga anaa sa isla.
Anaa usab sa dapit ang duha ka lahing mga mananap nga gitawag og Napoleon Wrasse ug Hump Head Wrasse kon naila nga Mameng.
Ang dapit biyahion nimo og 72 kilometros gikan sa dakbayan sa Surigao ug mosobra sa 100 ka kilometros kon gikan sa dakbayan sa Butuan pinaagi sa bus o V-hire.
Karon nagsingabot na ang summer ilakip sa inyong listahan nga bisitahon ang Cantilan, Surigao del Sur. Alex Badayos