LALAKENG giingong bugalbugalon gidunggab patay sa silingang hubog dihang nag-abot sila niadtong Miyerkulis sa alas 7:30 sa gabii sa Barangay Cahumayan, dakbayan sa Danao.
Si Elmer Kalipay, 32, dunay kapuyo, usa ka minero, dead-on-arrival (DOA) sa tambalanan sa Danao tungod sa mga samad dinunggaban sa kalawasan.
Gipusasan si Jayren Castillo, 32, minero, kinsa nadakpan sa pagresponde sa kapulisan human sa krimen.
Si Sr. Insp. Alejandro Batobalonos, hepe sa Danao Police Station nga nahinabi sa Superbalita Cebu, niingon nga nag-inom si Castillo sa balay sa ilang silingan.
Niagi si Kalipay ug nakit-an ni Castillo kinsa duna nay daang kasuko sa nauwahi gumikan sa pagka-bugal-bugalon.
“Napuno na daw siya kay kanunay siyang bugalbugalan sa biktima unya dapatan mao hubog man siya niadtong higayuna, iyang gidunggab,” dugang ni Batobalonos.
Hinuon wa molayas si Castillo sa pag-abot sa mga pulis, siya gipusasan.