MOSUPORTA ang Police Regional Office 7 sa tinguha sa Department of Interior and Local Government (DILG) nga papitlan og sticker ang mga balay nga drug free kon way bisan usa ka tagbalay nga naggamit og illegal nga drugas.

Ang PRO-7 miklaro hinuon nga wa pa sila makadawat og kamandoan niini gikan sa ilang ulohang buhatan o ba kaha sa DILG.

Apan matod ni Chief Supt. Noli Taliño nga kon ugaling mahinayon kini, andam sila mosuporta sanglit dako usab ni og ikatabang sa pag-ila sa usa ka balay nga wa na mobalik sa paggamit sa illegal nga drugas.

Niadtong aktibo pa ang kapulisan sa ilang kampanya batok sa illegal nga drugas, gitug-an ni Taliño nga usa ni sa ilang mga plano nga ilakip sa Oplan Tokhang ang pagpapilit og sticker.

Apan tungod sa pag hunong sa ilang anti drug operation, wa kini mahinayon.

“Maganda naman yung objective nitong paglalagay ng stickers sa mga bahay-bahay…kung tutuosin pwede maging part sana ng tokhang operation pero yung nga suspended yung mandato ng police tungkol dyan,” matod ni Taliño.

Samtang giangkon niya nga ilang nabantayan ang presensya sa mga drug personalities nga nalakip sa high value target human sa pagsuspenso sa ilang anti drug campaign.

Matod niya nga kadtong mga batan-on ug mga nalam­bigit sa drugas kompyansa na nga mag-estambay sa gawas hangtod sa panahon sa kaadlawon nga nagpasabot nga mibalik na usab kini sa ilang naandan nga bisyo.

Timailhan niini ang pagtumaw na usab sa ginagmayng krimen sama sa robbery hold up sa mga hilit nga dapit.

Dinhi sa syudad sa Sugbo, makita na usab sa mga eskina ang mga lalake gikan sa sayong kagabhion hangtod sa kaadlawon nga nakahatag og kahadlok na usab sa mga residente ilabi na sa mga hilit nga dapit.

Gimandoan hinuon ni Taliño ang mga police station nga molusad og roving patrol aron mabadlong kini o ipatuman ang curfew nga ordinansa sa Siyudad.