Tinun-an sa grade 2 nakuryentihan, patay

PATAY ang usa ka tinun-an sa Grade 2 sa Agsungot E­lementary School, Agsungot, bukirang barangay sa dakbayan sa Sugbo human nakuryentihan sa usa ka baya­basan sa dihang nag­lakaw pauli sa ilang balay niadtong Miyerkules, pasado alas 4:00 sa hapon.

Ang biktima giila ni Barangay Kapitan Noli Anne Al­over nga si Brent Joseph Maglasang, 7, taga Lower Ag­sungot.

Sa kasayuran nga nakuha ni Alcover, nasayran nga samtang nagbaktas ang biktima kauban sa laing mga bata nga estudyante, ilang naagian ang naputol nga wire sa kuryente sa poste sa kuryente.

Dali nga gidala ang biktima sa tambalanan sa siyudad sa Sugbo sa mga pulis nga nadestino sa barangay apan giingong gideklara kini nga de­ad-on-arrival sa mga doktor.

Human masayod si Alco­ver nanawag dayon kini sa buhatan sa Visayan Electric Company (Veco) aron masumpay og balik ang naputol nga wire sa kuryente sanglit naghatag kini og ka peligro sa iyang mga residente.

Dili pa makatug-an sa pagkakaron ang kapitan kon duna bay pagpabaya ang Veco sa pagkaputol sa ilang wire sa kuryente sanglit wala pa siyay kasayuran unsay hinungdan nganong kini nahitabo.

Iyang gitug-an sa Superbalira Cebu nga distansya sa iyang barangay hall ang nahitaboan ug kinahanglan pa nga iya ki­ning susihon aron masuta kon unsay nakaingon sa pagkakuryente sa bata.

Duda sa barangay opisyal nga dunay dakong sakyanan ang miagi sa lugar nga maoy hinungdan nga kini naputol.

Samtang ang mga ginikanan sa bata wala pay hukom kon moreklamo ba sila sa kapulisan kon kinsay manubag sa maong aksidente nga miresulta sa kamatayon sa 7-anyos nga batang lalake.

Makigtagbo pa si Alcover sa pamilya kon unsay ilang plano human sa nahitabong aksidente.

Si Sr. Insp. Arieza Otida, hepe sa Talamban Police Station, magpadala usab og imbestigador sa dapit diin nahitabo ang insidente aron pagsusi kon unsay tinuod nga nahitabo.

Sa pagkakaron, nagpaa­bot pa usab sa pormal nga rek­lamo sa ginikanan ug andam nila kining tabangan kon unsay gikinahanglan nga buhaton.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph