LAING 10 ka mga pulis ang tangtangon karong Lunes gikan sa buhatan diin sila gi-assign sa Cebu Provincial Police Office (CPPO).
Ang mao nga nga pulis giakusahan nga nalambigit sa illegal drugs busa parelibuhan sugod karong Lunes.
Kini maoy gipahibawo ni Sr. Supt. Eric Noble, director sa CPPO, dihang nahinabi sa Superbalita Cebu subay sa ilang nagpadayong internal cleansing.
Si Noble niingon nga kon mamatud-an sa imbestigasyon ang ilang kalambigitan sa illegal nga drugas, ila kining kasuhan ug taktakon gikan sa serbisyo.
Hatagan silag patas nga imbestigasyon aron makapanalipod sa ilang kaugalingon batok sa mga pasangil kanila.
Sumala pa niya nga nagpusotpusot ang mga reklamo nga iyang nadawat kada adlaw batok sa scalawag nga mga pulis sa CPPO.
Sagad sa iyang giparelibuhan kanunay motumaw ang ngalan sa mga reklamo.
Tungod sa ilang gipahigayong imbestigasyon, dunay basihan nga ibutang lang una ang maong mga pulis sa Provincial Holding Admin-Units (PHAU) sa CPPO.
Pinaagi niini, ma-monitor ni Noble ang lihok sa maong mga pulis samtang dali lang usab silang makatubag kon ipatawag samtang naa sila sa PHAU.
Giawhag niini ang mga residente sa Sugbo sa paghatag niyag impormasyon pinaagi sa pag-text kabahin sa mga hiwi nga binuhatan sa mga pulis sa lalawigan.
Nisaad si Noble nga iyang aksyunan ang mga reklamo nga moabot kaniya.