BANSALAN, Davao del Sur -- Naalarma na ang Sangguniang Bayan (SB)sa lungsod sa mga nahitabong krimen diin ang pinakauwahi mao ang pagpusil patay sa usa ka sakop sa Civil Security Unit (CSU).

Atol sa sesyon sa SB niadtong Huwebes sa buntag, Pebrero 23, gipangutana ni Bise Mayor Edwin Reyes ang komitiba sa peace and order sa mga lakang nga angay'ng buhaton aron madakpan ang mga kriminal.

"Unang-una, niadtong mayor pa ko dili ko gusto anang mga patay kay bisan gani mga suliran sa druga gusto nako madakpan gyud ug dili pamatyon," sulti ni Reyes.

Gibutyag sab ni Konsehal Sunny Macarampat, chairman sa komitiba sa peace and order nga iduso nila sa buhatan ni Mayor Quilin Sarte ang pagpakusog sa peace and order council, pinaagi sa paggahin og badyet.

Sumala ni Macarampat nga gikinahanglan ang kooperasyon sa mga taga barangay pinaagi sa paghatag og load sa mga tawong mahimong motabang sa pagpaabot og daling impormasyon kanila o di kaha sa kapulisan.

Hinuon, giklaro ni Macarampat nga nagpabiling malinawon ang lungsod luyo sa mga nahitabong pagpamusil.

Niadtong bulan sa Enero, usa ka drayber og traysikel ang gipusil didto sa Barangay Tubod samtang pauli na sa ilang balay sa Km. 81.

Samtang gipusil patay sab sa de-motorsiklong mamumuno si Jovy Alicaba, samtang padung mobantay sa munisipyo banda alas 10:30 sa gabii, Sabado.

Gidason ni Macarampat nga nakigtagbo na siya sa kapulisan aron mohimo og mas hugot nga random checkpoint panahon sa kagabhion ug kinahanglang madakpan ang mga motorsiklong way plakam, ilabi na ang pagsusi sa mga naka-helmet nga drayber ug angkas panahon sa kagabhion.