BALIK sa Bahay Pag-asa ang usa sa 11 ka mga niikyas nga menor de edad human kini nasiplatan sa kapolisan niadtong Huwebes sa kaadlawon sa Kiosko Kagawasan, Divisoria, dakbayan sa Cagayan de Oro.

Nasikop pagbalik ang menor de edad nga si John (bansagon gitago), 15, nga residente sa Barangay Balulang ning dakbayan.

Sa impormasiyon gikan sa Police Station 1 (PS1) sa Divisoria, giingong milayas sa buhatan ilabi na sa Bahay Pag-asa nga nahimutang sa Lumbia ang suspek niadtong adlaw nga Martes, Pebrero 21, mga ala 1:30 sa kadlawon.

Nasayran nga nagpakitabang ang house parent sa buhatan kalabot na sa pagsibat sa mga menor de edad gikan sa ilang kustodiya, hinungdan nga gi-aksiyonan gyud dayon usab kini sa mga otoridad ilabi na sa PS1.

Giingong aduna pa kini laing mga kauban nga naka-ikyas tungod kay mokabat man matud pa kini sila sa 11 nga mitakas ug ang uban niini ang pabilin pa nga gawasnon.