UPAT ka mga mananagat ang na missing niaging adlaw ug kagahapong adlawa, Pebrero 23, ang nakauli na sa ilang tagsa-tagsa ka puloy-anan sa Misamis Oriental.

Unang na-missing mao sila si Allan Abragan, 49, minyo, ug Allan Naluan, 51, pulos residente sa Purok 1, Barangay San Pedro, lungsod sa Initao, Misamis Oriental.

Basi sa report gikan sa Provincial Disaster Risk Reduction Management Council ubos sa pagdumala ni officer-in-charge Fernando Vicente Dy, nasuta nga missing sugod niadtong Pebrero 21 ang mga mananagat.

Na missing ang mga biktima gumikan sa kusog nga balod nga nasinati atol sa pagpanagat.

Gihimo ang operasyon pagpangita ug koordinasyon sa duha kung kini ba ang mga mananagat nga napalgan sa dakbayan sa Ozamis City apan nakadunggo diay ang duha sa Barangay Calangahan, lungsod sa Lugait, ug giatiman na sa kapitan sa barangay nga si Kapitan Abing Arque.

Samtang luwas usab nga nakauli ang mga mananagat nga sila si Jonathan Bagongon ug Eliezer Avila pulos residente sa Barangay Tabok, lungsod sa Lagonglong, Misamis Oriental.

Nakita ang duha ka mga mananagat nga nawala niagi pang adlaw sa lawod na sa lungsod sa Libertad, Misamis Oriental.

Giatiman na usab sa pag Huwebes ang duha ka mga mananagat sa lokal nga kagamhanan sa Libertad. (SVB)