KANHI overseas Filipino worker (OFW) gipusil-patay sa wa mailhing mamumuno sulod sa iyang barbershop sa dalan I. Tabura, Barangay Pardo, dakbayan sa Sugbo kagahapon sa alas 11:00 sa buntag.
Si Roland Abellana, 39, ulitawo, kanhi OFW, patay dihadiha human nakaangkog samad pinusilan sa ulo ug sa lawas. Si SPO2 Wetzel Berry, imbestigador sa Homicide Section sa Cebu City Police Office, nga "love triangle" ang motibo sa krime.
Matod pa niini nga usa ka wa mailhing lalake naka-bonnet ug nag-jacket maoy nagpusil sa biktima.
Ang biktima naglingkodlingkod sa iyang barbershop samtang nagpaabot og kustomer.
Nakugang nalang ang iyang higala, mga silingan sa sipa kaayong buto.
Nakita ang biktima nga nahay-ad ug may samad sa ulo ug lawas.
Ang mamumuno yano lang naglakaw sa karsada dayon misakay sa PUJ paingon sa habagatang bahin sa Probinsiya sumala sa mga nakasaksi.
"Third party among gitan-aw kay ang mga sulti diri sa mga silingan daghan siyang na uyab nga minyo ug mga batan-on," dugang ni SPO2 Berry.
Wa nila isalikway ang posibilidad nga dunay mga tawong nasuko sa biktima.
Hinuon, ilaha pang sutaon sa mga kabanay niini susihon kon wa bay hulga sa kinabuhi ang biktima.