GILATOS sa host Cleveland Cavaliers ang New York Knicks, 119-104, atol sa NBA regular season kagahapon didto sa Quicken Loans Arena.
Bangis nga niabag si Lebron James sa kadaogan sa Cleveland agi sa iyang triple-double nga adunay 18 puntos, 15 ka assists ug 13 ka rebounds.
Nihatag sab si Kyrie Irving og 23 puntos ug unom ka assists, samtang nipupo si Kyle Korver og 20 puntos apil ang unom ka tres sa 10 niyang tira sa gawas.
Kusog ang pagsugod sa New York sa unang kwarter human mibinat sila og 18-10 run sa 5:16 minutos nabilin.
Apan wala madugay nabali ang hangin ngadto sa Cavaliers pagsirado sa maong kwarter sa iskor 34-33. Gikan ana, gitumban sa Cavs ang pedal ug nibinat og 18 puntos nga labaw paghuman sa unang half sa iskor 69-51.
Pabilin gihapon nakuptan sa Cavaliers ang distansyang labaw ug naabot pa sa ilang kinataas nga labaw nga 19 puntos, 110-91, sa katapusang kwarter.
Tungod sa kadako sa labaw, wala na maapsan sa Knicks aron mahatag nila ang ika-upat nga sunod-sunod nga daug sa Cavs.
Pabiling nag-una ang Cleveland sa eastern conference nga adunay 40-16 win-loss record, samtang nanglimbasog ang Knicks sa ika-12 nga pwesto sa maong conference nga anaay 23-35.