MOPUSIL ang Cagayan de Oro National Highschool sa ilang ikatulong sunod-sunod nga daog pag-agbat nila sa Iponan National Highschool sa 1st Cagayan de Oro Public Schools Basketball Challenge highschool boys division, diin pagadulaon didto sa West City Central covered courts.
Solong nag-una karon ang City High sa bracket B nga adunay limpyong 2-0 win-loss record.
Sulod sa ilang mga daug, gilat-an nila ang Carmen National Highschool agi sa 89-50 ug ang Tablon National Highschool sa iskor 81-51.
Nagsunod ang Carmen NHS sa ika-duhang pwesto nga adunay 2-1, samtang ang Tablon NHS anaa sa ika-tulo nga anaay 2-2.
Nanglimbasog karon ang Iponan NHS sa ika-upat nga adunay 1-1 card ug sulayan nila ang bangis sa mas eksperyensadong City High sa ilang dula karon sa alas-11 sa buntag.
Sa bracket A, sulayan sa Misamis Oriental General Comprehensive High School nga mobangon sa ilang duha ka sunod-sunod nga kapildehan pag-atbang nila karon batok sa Kauswagan National Highschool sa alas-10 sa buntag.
Mao ni ang pinaka bati nga pagsugod sa MOGCHS Cavaliers niini nga liga kon itandi sa niagi sa Oro SPEED Inter-Public School Basketball League.
Nabugkos ang Mogchs sa Indahag National Highschool sa ika-upat ug kataposang pwesto nga parehas adunay 0-2 record sa maong bracket.
Nagtabla sab ang Kauswagan NHS ug Canitoan National Highschool sa ika-duha nga pwesto nga parehas anaay 1-1 record. Sa Highschool girls, magsangka ang Carmen NHS ug Canitoan NHS sa kataposang dula karon sa alas-12 sa udto.
Sa elementary boys, maagbat sa host West CCS ang South City Central School sa pag-abri sa mga dula karon sa alas-otso sa buntag.
Sundan dayon tali sa PN Roa ug Pagatpat Elementary School sa alas-nuebe sa buntag.