NAKABSAN sa kinabuhi ang usa ka amahan human giingong gipusil sa daan na nga kabikil niini niadtong Huwebes mga alas 7:00 sa gabii sa Barangay San Antonio lungsod sa Jasaan, Misamis Oriental.

Giila ang biktima nga si Serlan Nacua Elevera, hingkod ang edad, residente sa dapit.

Giila ang suspetsado nga si Maximo Panhay, silingan sa biktima ug usa ka empleyado sa local nga kagamhanan sa maong lungsod.

Si Senior Police Officer 4 Reynaldo Talipan, imbestigador sa Jasaan Police Station, nibutyag nga nag-inom pa ang biktima ug suspek sa wala pa nahitabo ang insidente.

Gani ang mga residente sa dapit nakurat sa hitabo tungod kay wala man gani nagbikil ang duha.

Daw kalit lang mihulbot sa iyang kalibre 22 ang suspek ug gipusil sa liog si Elevera hinungdan sa iyang hinanaling kamatayon.

Nasayrang nagkabikil na kaniadto ang suspek ug biktima gumikan kay daw uyab sa anak sa biktima ang anak ni Panhay apan imbes mangasawa ang anak ni Elevera giingong mibalibad si Maximo tungod kay wala kini ikabuhi sa iyang anak.

Giingong didto nagsugod ang dili maayong relasyon sa duha.

Ning pagbalita, boluntaryong mitahan ang suspek kinsa gikatakdang mag-atubang og kasong murder.