ANG Christian Basketball Group of Davao (CBGD), nga gitugotan sa Samahang Basketbol ng Pilipinas (SBP), tigian sa Abril didto sa Davao City Recreation Center.

Kini ang pahayag ni CBGD league director Eric Diamse sa Davao Sportswriters Association (DSA) Forum didto sa The Annex Events Center of SM City Davao niadtong Huwebes.

Matud ni Diamse nagsugod ang liga niadtong 2013 nga ang tumong mao ang pagpaduol sa mga partisipante ngadto sa Christian-guided program pinaagi sa basketball.

"Our main objective is the values transformation of the players during the league," ni Diamse kinsa midugang nga ang torneyo mas labaw pa sa basketball.

Niya pa nga atol sa half-time sa matag duwa, mopaambit og pulong sa Ginoo ug values formation.

Samtang ang tims mamahimong magparehistro og 15-below, 20-below, 30-below ug open categories apan napulo lang ka tim sa matag kategorya ang kinahanglang mopresenta og simbahan.

"We encourage church teams to invite non-members and seek opportunity to share with them the word of God," pahayag niya.

Ang rehistrasyon mokantidad og P3,000 matag tim alang sa premyong kuwarta ug officiating fees.

Dugang ni Diamse nga kasagarang dula tigian sa bakanteng basketball court sa nagkadaiyang barangays apan sa opening mamahimo nga didto himuon sa Almendras Gym. (Marizz S. Robilla)