MATI CITY -- Gilubong na sa katawhan sa Barangay Lanca, Mati City ang usa ka dugong nga patay nang midunggo daplin sa baybayon sa Sitio Magcot, Barangay Lanca, Mati City sa Davao Oriental, Pebrero 21.
Sa pagkakaplag sa maong matang sa mananap, nagkagubot ang mga komento sa mga netizens human ma-post ang hulagway niini sa social media nga Facebook.
Nagpangutana ang netizens kung sinyales na ba kini sa mga umaabot nga katalagman, sanglit nanggawas na ang ubay-ubay nga mga katingad-an ug talagsaon nga mananap sa kadagatan.
Kahinumdoman nga sa milabay nga semana, duna sab mga nakuhang hulagway sa pagdunggo sa mga oarfish sa Cagayan de Oro City ug sa Butuan City.
Diha sa'y usa ka "globster" sa Dinagat Islands ug higanteng sunfish sa Balingasag, Misamis Oriental.
Giingon sa pipila nga makita lamang kining mga klase sa mananap sa kina-ilawmang bahin sa kadagatan ug nanggawas kini human ilang nasinati ang pag-uyog sa ilawom sa kadagatan, apan wa pa kini napamatud-an sa mga eksperto.
Sa sunod-sunod nga pagpanggawas sa maong matang sa mga talagsaon mananap, gisundan sab dayon kini'g mga linog, apan ang Philippine Institute of Volcanology and Seismology (Phivolcs) nagpasabot nga usa ka natural calamity ang linog ug kabahin kini sa pagbag-o-bag-o sa dagan sa panahon. (Jeepy P. Compio)