DI UNTA madayon ang gitawag karon nga Cebu-Cordova Link Expressway kun CCLEX kon di pa aktibong nitabang si Mayor Tomas Osmeña.

Atong nasayran nga lakip sa gibuhat ni Osmeña mao ang pag­padala og mga respetadong representante gikan sa City Hall ug sa pribadong sektor a­­­lang sa mga teknikal nga mga preparasyon.

Gisiguro ni Mayor Osmeña nga way mahitabo nga demolisyon diha sa Barangay Ermita ug Pasil tungod sa desinyo sa taytayan ug adto na mosumpay sa viaduct nga padulong sa South Road Properties ug sa Plaza Independencia.

Kahinumdoman, si kanhi ma­yor Mike Rama gusto nga ang taytayan adto motugpa sa baba sa sapa sa Guadalupe ug moabot ngadto dapit sa dalan Colon.

Nagpasabot kini nga magdemolisyon sa kabalayan sa mga lumolupyo sa kilid sa sapa ug makaapekto kini sa mga taga Pasil ug Ermita.

Gani, duna pay mga apektadong mga edispiyo ngadto na sa dalan Colon ug Sanciangko.

Tungod ni Mayor Osmeña, di na kini mahitabo.  Tungod sa mayor, madayon ang pagtukod sa taytayan nga walay maapektado nga mga taga Sugbo. Mao lang kini ang akong nasayran kabahin sa mga preparasyon.

Duterte

Tungod niini, dakong sayop ang niingon nga ceremonial lang ang papel sa mayor. Ato na lang palabyon ang pagka ignorante sa namulong niini kay wala man siya makahibawo sa tinuod nga dagan sa mga preparasyon.

Gani, si Secretary Adi Sitoy man ang nag-imbitar ni Presidente Rodrigo Duterte aron maoy espesyal nga dinapit sa groundbreaking ceremony di­ha sa Cordova karong Marso 2.

Ang maong taytayan usa ka private-public partnership project sa pribadong Metro Pacific ug sa lungsod sa Cordova ug sa Syudad sa Sugbo.

Kining maong kalihokan nagpakita nga dunay laing taytayan ang mga Sugboanon padulong sa Malacañang ug mao kini si Secretary Sitoy.

Cordova

Kining maong kalambuan, mahinungdanon alang sa mga taga Cordova ug alang kang Secretary Sitoy. Di mosugot ang kalihim nga malawgaw kini.

Sukad natukod ang lungsod sa Cordova, maisip kini nato nga taga mainland sa Sugbo nga naa sa suok sa isla sa Mactan. Layo sab alang sa taga Cordova ang syudad.

Apan mausab na kini inig human unya sa tukoron nga taytayan nga magsumpay sa Cordova ug sa Syudad sa Sugbo.

(@anol_cebu sa Twitter)