NABILANNGGO na sa Camp Crame si Senador Leila de Lima human siya malutsi og warrant of arrest sa kaso sa drugas.

Siya giakusahan nga nikuha og minilyon ka pesos nga pahat sa negusyo sa drugas sa National Bilibid Prisons.

Ang namasangil kaniya mao ang high profile nga mga bini­langgo sa NBP nga giisip nang drug lords dinhi sa nasod.

Ang kasong gipasaka sa korte wa tubaga sa senador kay alang sa iyang kampo, kini way jurisdiction.

Daghan ang nangalipay sa pagkabilanggo ni De Lima samtang duna usay nangaluoy sa iyang kahimtang, kadaghanan niini nagtuong di makabuhat ang kanhi human rights commissioner.

Klarong nabahin ang katawhan ning isyu ni De Lima, labina kay gipasanginlan sa senador si Presidente Rodrigo Duterte nga maoy nagpaluyo tungod sa iyang pagpanaway niini, labina sa extra judicial killings sukad sa mayor pa ang presidente sa Davao City.

Ang kaso naa na sa korte. Busa, maayong pasagdan kon unsa may dagan o pagligid sa hustisya nga nailhan nang hinay, labina kon adunahan ang nalambigit.

Ang korte na maoy moayag sa mga ebedensya sa duha ka mga habig. Ang hukmanan mas maayo itandi sa Senado ug Ubos Balay Balauranan.

Di sayonsayon modawat ang korte og ebedensya kay timbangon pa gani niini kon angay ba o di ipresentar ang usa ka ebedensya.

Di sama sa hearing sa mga magbabalaud nga kuno “in aid of legislation” apan “in aid of destruction” diay ang tumong.

Ang angay karon nga bantayan sa katawhan mao ang patas ug way pagpinig nga hearing sa kaso diha sa labing ubos nga korte.

Sa ingon molutaw ang matuod, guilty ba o walay sala si De Lima sa mga pasangil nga gibato kaniya.