KONSEHAL sa barangay kinsa maestro usab sa usa ka pampubliko nga tunghaan namatay human maaksidente sa lungsod sa Argao niadtong Biyernes sa gabii.
Ang biktima giila nga si Jague Jun Jaca, 36, residente sa Barangay Talaga, Argao, magtutudlo sa Argao National High School.
Base sa imbestigasyon sa Argao Police, nasuta nga nagmaneho sa iyang motorsiklo (968-6XX) si Jaca dihang nahitabo ang aksidente sa dan I.C. Kintanar Barangay Lamacan, Argao.
Matod ni PO3 Bobby Naces, desk officer, nga aduna’y usa ka laing motorsiklo (GE91198) nga gimaneho ni Eugene Calisan, 26, ang nibangga kang Jaca.
Anaa magpuyo si Calisan sa Sitio Luwag, Barangay Canbanua, Argao.
Nasayran nga nisuway pag-overtake si Calisan sa usa ka traysikol sa iyang atubangan, samtang anaa sa pikas lane si Jaca.
Kalit nga nibangga si Calisan sa biktima hinungdan sa naangkon niini nga samad sa iyang kalawasan nga niresulta sa iyang kamatayon.
Nasayran ning mantalaan nga konsehal si Jaca sa Brgy.Tabon, Dalaguete.