HUMAN nga gipahunong ni Presidente Rodrigo Duterte ang operasyon sa kapulisan kabahin sa kampanya batok ilegal nga drugas, naalarma si Association of Barangay Councils (ABC) President ug Barangay Tisa Captain Philip Zafra niini diin nakita niya nga nigara ang mga pusher sa ilegal nga negosyo niini.
Tungod niini madasigon siya nga nipasiugda sa kampanya batok ilegal nga drugas diin gilusad kini sa Barangay Tisa kagahapon ug ginganlan kini niya og “Barkada”.
Ang Barkada, usa ka anti-illegal drug organization diin naghatag kini og kahigayonan sa yano nga lumolupyo sa matag sitio nga motabang sa barangay aron paghunong sa ilegal nga negosyo sa drugas.
“So mao ni among nakita nga usa ka epektibo nga paagi sa pagsumpo sa ilegal nga drugas. Kay kon ang tanan magpakabana, manginlabot, wa na'y mopalit anang mga ilegal nga drugas,“ si Zafra kinsa nahinabi sa Superbalita Cebu.
Pinaagi sa Barkada, masuta ang lista sa matag residente sa sitio aron masayran usab kinsa ang wala malista ug kadtong wala gyud magpalista kay naghimo og ilegal nga aktibidad.
Una nga gilusad ang Barkada sa Barangay Tisa diin mosunod ang laing 79 ka barangay sa dakbayan sa Sugbo.
Gibutyag usab ni Zafra nga isip ABC president, gitagbo niya ang mga kapitan aron mahibawo niini ug aron usab mosunod isip tabang nila sa Philippine Drug Enforcement Agency (PDEA) nga mao na karo'y nangulo sa anti-illegal drug campaign sa nasod.
Dugang sa kapitan nga duha ngadto sa tulo ka mga high-value target ang nasuta nila nga anaa sa Tisa apan nagsige sila og update sa ilang listahan tungod kay aduna'y dayo nga gikan sa laing barangay nga mobalhin sa laing barangay.
Parte ang maong organisasyon sa Barangay Anti-Drug Abuse Council diin lakip niini ang simbahan, non-government organization, magtutudlo o ang tunghaan, kabatan-onan ug uban pa.
Gidasig hinuon niini ang tanang mga lumolupyo nga tabangan niini ang matag barangay aron pagsumpo sa ilegal nga drugas.
Gilusad ang maong kampanya kagahapin dungan na usab sa kasumaran sa EDSA.