DILI mouban ang Cebu Integrated Transport Cooperative (Citrasco) ug mayoriya sa National Confederation of Transportworkers Unity (NCTU) sa gipanawagan nga transport strike sa Pinagkaisang Samahan ng mga Tsuper at Opereytor Nationwide (Piston) ugma.
Si Ryan Benjamin Yu, chairman sa Citrasco, dili kumbinsido sa mga argumento nga gipadayag sa Piston atol sa ilang tigom kagahapon uban sa mga lider sa transport sector sa Sugbo.
Si Yu nagtuo nga duna pay laing paagi pagsulbad sa gikabalak-an sa Piston sama sa pag-phase out sa gubaon ug kagangkagang nga mga public utility jeepney nga nagpanuigon og 15 anyos ug pataas.
“Way bisan usa ka papel nga nagpakita nga ipatuman tomorrow or in the near future ang phase out sa mga PUJ.
So, unsa may bases kon mao na ilang gipanawagan, wa man tay nakita nga papel. So, unsa may rason mag-strike ta?”
pasabot ni Yu sa ilang desisyon nga dili mokuyog sa welga, sa pakighinabi sa Superbalita Cebu kagahapon.
Siya nidugang nga padayon ang ilang pakigestorya sa gobiyerno aron mapaabot ang ilang mga yangongo sa sektor sa transportasyon.
Ang Citrasco dunay 1,000 ka units nga PUJ ug 200 ka unit sa taxi.
Si Romeo Armamento, national vice president sa NCTU-Visayas, nibutyag nga kadaghanan sa ilang mga miyembro dili mokuyog sa welga ugma.
Matod niya dunay pipila ka mga drayber og multicab nga magbiyahian gikan Danao hangtod Mandaue City ug vice versa ang nipadayag nga dili mobiyahe.
Sila nagtuo nga duna pay paagi nga paminawon sila sa gobiyerno pinaagi sa ilang iduso nga counter-proposal sa Land Transportation Franchising and Regulatory Board ugma nga gitawag og “Progressive, Just and Fair PUJ Transition mechanism” nga makatabang sa ilang sektor.
Sila si Yu ug Armamento nanawagan sa mga drayber nga moapil sa welga nga dili hulgaon ang mga drayber nga dili moapil, ug ipatigbabaw ang pagrespetuhay.
Si Greg Perez, coordinator sa Piston Cebu, masaligon nga 80 porsiyento gihapon sa dagan sa transportasyon sa Sugbo ang maapektuhan sa ilang himuon nga welga bisan og dili moapil ang mga miyembro sa ubang mga grupo.
Siya dili makapasalig nga makontrolar 100 porsiyento ang mga drayber nga moapil sa welga nga mohimo og kasamok sa ubang mga drayber nga wa mouban.
“Dili mahimo nga among grupo lang ang pasanginlan. Dili ta makagarantiya nga 100 percent kay dili nato makontrol ang hunahuna sa ubang mga drayber nga masamok,” dugang ni Perez.