NASAMOK og kadiyot ang rally nga gipasiugdahan sa mga tigpaluyo ni Presidente Rodrigo Duterte sa Plaza Independencia, dakbayan sa Sugbo kagahapon.

Pipila ka mga miyembro sa Mayor Rodrigo Roa Duterte (MRRD) sa Sugbo nasuko dihang wala gipatukar sa mga or­ganizer ang theme song sa grupo nga gitawag og ‘Pederalismo.’

Si Igmedio Sallente, chairman sa MRRD Cebu, nisukmat ug nitudlotudlo ni Dr. Rowena Burden, lead facilitator sa ‘Ipadayon ang Kausaban’ rally, sa kasuko nga wa mapatukar ang kanta nga ‘Pederalismo.’

Atol sa rally, gibalikbalik og patukar ang mga kanta nga ‘Magkaisa’ ug ‘Bayan Ko’ ug gusto sa mga opisyal sa MRRD nga mapatukar usab ang ‘Pederalismo.’

Apan si Burden niingon nga nahuman na ang programa ug wa maapil sa imbitasyon ang grupo nila ni Sallente nga wa siya personal nga nakaila.

“If you are a true supporter of President Duterte you will not do anything to embarrass the name of the president. Nagpakauwaw lang siya sa iyang gihimo,” pahayag ni Burden nga gipangayoan og komento sa nahitabo.

Si Rudy Flormata, vice chairman sa MRRD, niingon nga nasakitan sila dihang gipahibawo nga sa katapusan na sa programa ipatukar ang ‘Pederalismo’ diin wa nay maminaw ug manguli na ang mga tawo.

Ang United for Democracy and Duterte Supporters Group (UDDS) nagpahigayon sa rally agi og pagpakita sa suporta kang Duterte.