AYAW kabalaka bisan kon adunay ilusad nga transport strike ugmang adlawa.
Ang Cebu City Government mopakatap og labing minos 10 ka mga bus aron maoy mopasakay sa mangatanggong nga mga pasahero aron ihatod sa ilang destinasyon.
Ang Mandaue City usab mopadagan og mga sakyanan, labina niadtong gikan sa nagkadaiyang department sa lokal nga kagamhanan.
Si Konsehal Dave Tumulak, chairman sa committee on public order and safety, nagkanayon nga kon adunay panginahanglan nga mopadagan og dugang mga bus ang Siyudad para pagpasakay sa mga pasahero aduna pay daghang bus ug dumptruck nga on-standby ang City Hall.
Mga rota nga padad-an og bus (air-conditioned ug di),sa City Government mao ang Bulacao, Labangon, Banawa, Guadalupe sa south district.
Padaganan sab ang Lahug, Mabolo, SM, Ayala ug Talamban sa north district.
Ang matag rota adunay tag-duha ka mga bus ang padaganon nga adunay sakay nga pulis ug radio operator para dali ra silang makahatag og komunikasyon paingon sa command center.
Apan giklaro ni Tumulak nga kon normal ra ang dagan sa transportasyon karong Lunes, di sila mopadagan og daghang bus aron dili sila makahatag og dugang problema sa trapiko.
Aron di maapektuhan ang mga PUJ driver nga wa niapil sa ilang gitawag og “Tigil Pasada” nga gipasiugdahan sa Pagkakaisa ng Samahan ng mga Tsuper at Opereytor (Piston).
Dinhi sa Sugbo, adunay 700 ka mga drayber nga miyembro sa Piston ang gipanglantawan nga moapil sa protesta aron pakigbatokan ang plano sa pagwagtang sa mga PUJ nga nag-edad og 15 anyos pataas.
Matod ni Greg Perez, coordinator sa Piston Cebu, nga magsugod ang ilang transport strike alas 4 sa kadlawon hangtod alas 3 sa hapon ugma.
Si Tumulak, sa iyang bahin, nagkanayon nga mohunong sila pagpadagan sa mga bus sa higayon nga mabalik na ang normal nga transportasyon sa siyudad.