ANG gugma sa inahan dili masukod ug wala’y kinutoban ug buhaton ang tanan tungod og alang sa pinalanggang anak.
Si Lailanie Macarambon, 43, sa 12-anyos nga si Najib Macarambon kinsa dunay Congenital Hydrocephalus gikan pa sa pagkatawo niini andam himuon ang tanan alang sa iyang masakiton nga anak.
Ang mag-inahan nagpuyo kaniadto sa Barangay Camaman-an ning siyudad apan human nasunogan dunay naluoy kanila ug libre kini nga gipapuyo.
Kong kanunay kamo moagi diha sa over pass nga nagkutay sa duha ka mga dagkong mall sa dalan C.M Recto sigurado nga inyo na nga namatikdan kining inahan ug anak nga nagpalimos sa maong dapit.
Nag-inusara na lamang si Lailanie nga nag-atiman sa iyang anak human nibiya ang iyang bana aron sa pagpangita og trabaho.
Nasayran nga dili maayo ang pagtagad sa pamilya ni Lailanie ngadto kanila tungod na usab kay supak sukad pa kaniadto ang mga ginikanan niini sa iyang relasiyon sa iyang bana.
Sakit
Ang 12 anyos nga anak ni Lailanie dunay sobra nga cerebrospinal fluid (CSF) sa utok atol sa pagkatawo niini ug giingong talagsaon lamang kini nga sakit sa bata.
Ang sobra niini nga tubig makahatag og pressure sa utok sa bata nga maoy hinungdan sa pagka daot sa utok ug sa pangisip lakip na sa problema sa panglawas.
Giingong pabilin kini nga ma-deform ang iyang ulo gumikan kay congenital man ang sakit niini ug moabot ang panahon nga maapektohan na gayud ang iyang utok.
Wala’y laing gusto si Lailanie kundili nga maka-survive ang anak gikan sa kahimtang niini ilabi na sa operasiyon apan gumikan sa kadugayon na gikan unta sa schedule niini nga 2nd operation hinungdan nga aduna na kini pagduha-duha nga mapa-operahan ang bata.
Gibutyag niini nga andam kini nga pa-operahan ang anak kun ugaling adunay mopasalig sa gastos niini.
“Mosugot ko operahan siya kung naa mohatag ug motabang financial, okay ra gyud basta sigurado, ako ra biya gyud gusto maka-survive akong anak,” dugang pahayag niini.
Na-operahan na si Najib sa dihang nag edad pa kini og 2 ka tuig niadtong tuig tuig 2007 sa German’s doctor ug unta operahan kini pag-usab niadtong tuig 2015 apan gumikan sa kakulangon sa financial ug kagamitan hinungdan nga wala kini mapadayon.
Daghan na ang giduolan niini nga mga ahensiya sa gobyerno apan dili kini pa-igo sa ilang mga panginahanglanon sa pang-adlaw adlaw ug labaw nga dili kini igo alang sa operasiyon sa bata.
Gawas nga nasakitan kini sa nahi-agoman sa ilang pamilya ilabi na sa iyang anak mas labaw kining masakitan sa mga pagpangtamay ug pagpanglibak ngadto kanila ilabi na kung lakip ang pamilya ang gikaulaw ang ilang kahimtang ug wala man gani makahuna-huna sa pagtabang kanila.
“Naay kaisa nga nakita nako akong ig-agaw ba, nagdali-dali gyud siya og naog halos na siya mahulog diha (overpass), maestra man to siya, wala ra pud ko di man ko mamugos, wala siguro kaantos tingala ko gilabayan man ko og P100, siya gyud to, nakonsensiya, sakitan biya ko,” ang halos nagluha nga pahayag ni Lailanie.
Gani mabatian usab niini ang pagtamay kanila bisan asa gumikan kay aduany kaisa nga bisan sa pagsulod sa usa ka iladong fastfood gidid-an kini sila nga unta dili man sila mangayo kay lage kini lamang ang makapalipay ni Najib ang makakaon sa maong fastfood bisan paman gani og magluya kini.
Sa kalig-on nga gipakita ni Lailanie sa pag-inusarang pag-atiman sa iyang anak dili gayud kalikayan nga aduna usab matud pa’y panahon nga kapuyon na kini sa kahimtang apan wala kini plano nga mo-undang diha sa pagsuroy-suroy sa kadalanan alang kanilang duha sa iyang anak.
Matud pa usab niini nga dili gayud malikayan nga makasab-an niini ang anak gumikan na usab sa kakapoy. Samtang kung saputon usab si Najib maglasong kini ug usahay siya ang mapahimungtan.
Maka-estorya si Najib apan dili gayud kini makabarog sa kaugalingon gani sakit alang sa inahan nga makita ang anak nga susama niini og kahimtang apan wala kini mahimo gawas sa pag-atiman sa bata ug gitugyan na lamang usab ang tanan sa Kahitas-an.
Hangyo ni Lailanie dili lamang sa gobyerno apan sa kung kinsa man ang adunay malumong kasing-kasing nga unta matabangan ang anak sa operasiyon niini pinaagi sa financial nga tabang.Buot usab niini nga ma operahan ang anak sa usa ka pribadong ospital ning siyudad diin ang doctor gayud niini sukad kaniadto ang mag-opera aron nga pagsiguro sa kaluwasan niini.
Dako usab ang kalipay niini kung adunay mo-donate og bag-o matud pa nga wheelchair sa iyang anak kay lage nag-tuig na kini human usab giahtag sa nalooy kanila niadtong milabay nga tuig isip pinaskohan.
Si Lailanie andam nga dawaton ang mga pagtamay ngadto na kanila kung kini man ang makaayo sa ilang duha sa iyang anak ug tanan igo na lamang gitugyan sa Kahitas-an.Unta ang mga susama niini ang mahatagan og dakong pagtagad sa gobyerno gumikan kay kinabuhi sa inosente ang gihisgotan niani nga sitwasiyon.